【娛樂人物】Anson Kong單飛唱出成績 
操弗等騷肌

更新時間 (HKT): 2021.04.09 02:00

ViuTV大前年發掘了本地薑男團MIRROR,繼姜濤後,江𤒹生(Anson Kong)亦是迅速冒起的靚仔歌手,去年單飛推出四首歌曲,最近新歌《黑之呼吸》亦好評如潮。MIRROR下月在九展開騷,AK近日密密健身,準備隨時大晒腹肌,而他亦希望三年後推出個人創作EP。

人氣爆燈的MIRROR將於下月在九展舉行演唱會,成員之一的江𤒹生(AK)日前接受訪問時,表示感到無形壓力,他說:「組合第一個騷係出道一個月嗰陣,睇返唔係好滿意,大家都好幼嫩,𠵱家出道第三個年頭,希望大家睇到我哋成長,大個仔咗。」

每次都諗最後

AK同時展開操弗大計,密密練得六嚿腹肌,他說:「好彩我唔使減肥,反而要增肌,食多啲肉,少食多餐唔使捱餓,但有時食得多都好辛苦。」問到是否準備隨時騷肌?他笑言:「想着衫好睇啲,騷肌要睇情況,如果好似張繼聰咁大隻,唔使着衫出街都得啦,邊會怕露,你睇佢不知露得幾開心,得閒又露吓手臂,得閒又着吓背心影相,鍾意佢早期有鋼條、胸肌、腹肌齊全,有佢個level就夠,男仔總係膚淺,夠大隻就騷得啦!」

疫情下除了推出新歌,AK亦劇接劇,去年有《男排女將》及《打天下》推出,工作不斷,他謙稱︰「由《造星》玩比賽到𠵱家我哋都係幸運小朋友,得到大家關注同喜愛,舊年疫情全世界好多工作停頓,我哋依然受關注,真係好珍惜,每次都諗最後一次。」

目標出創作EP

早年觀眾狠批香港樂壇已死,近年MIRROR的誕生令人改觀,圈中人都看好這群年輕新生代,AK坦言對推動樂壇有團火,他說︰「真心希望成為推動香港音樂巨輪其中一個齒輪,樂壇好大,好難只靠我哋12個去改變,要配合好多人合作,知道大家都好出力,不論新人或前輩都有推出新歌,我覺得香港聽眾可以接受度再大啲,接受不同風格,近年都出咗好多年輕化不同音樂製作人,耳仔接受度可以再大啲。」

身為跳唱男團成員,AK有感香港跳唱組合非主打,而自己聽歌領域很廣,接受融合曲風,他認為香港音樂作品不遜於外國,擅於玩結他、彈琴及跳舞的他,目標在三年後推出個人創作EP。

場地提供:VS MEDIA

娛聞樂陪你走遍全球追星,即Like「娛果」FB 專頁!
BannerBanner