Anson Kong為失獎黑面解畫 狂操肌隨時剝衫滿足鏡粉

更新時間 (HKT): 2021.04.09 00:30

3年前,ViuTV大搞本土創作,在真人騷中發掘了本地薑男團MIRROR,再以分散形式獨立發展,一群青春偶像派風氣瀰漫,令香港沉寂已久的樂壇衍生新氣象。團隊中除了主將姜濤爆紅外,其他成員也能歌善舞相繼跑出,成為樂壇新血。江𤒹生(Anson Kong)去年單飛先後推出4首歌曲,作品登上各大音樂榜,成績有目共睹。

新歌《黑之呼吸》相隔4個月後推出,歌曲可說是為Anson Kong度身訂做,描述他曾經的內心世界,圍繞「虛偽」與「情緒」,憑歌詞寄予心聲,「一分半秒論斷何其片面,眉頭額角怎去辨認良善」、「人們扭曲我心意,招惹口舌,不會反駁就卸下言詞」,直接為他在今年商台叱咤頒獎禮上黑面風波解畫。

今年元旦日的叱咤樂壇頒獎禮上,當宣佈「叱咤樂壇生力軍金獎」由MIRROR成員Jer(柳應廷)高呼聲下得獎,於台下的Anson Kong被鏡頭捕捉到失落神情,且激動得眼泛淚光,好兄弟Jer在台上加以安慰:「唔好唔開心,我哋一齊繼續努力,加油!」事後Anson Kong在IG發文吐心聲表達失望:「等了28年終於到今日,有點失望,因為曾經很期待,但自問今年已經盡了最大努力。」並向身邊幫過他的人致謝。

「矛盾係,戴假面具會俾人話官腔」

Anson Kong日前為《黑之呼吸》宣傳時直認「黑面」之說,並坦承自我控制情緒失當:「好多人覺得點解我要黑面,嗰刻我係單純自己唔開心,對自己好失望、失落,令屋企人同幫過我嘅人失望,覺得對佢哋冇交代,個心沉一沉。我冇做好我表情,但啲人就單憑一張相定奪我係點嘅人。人與人之間相處好耐,都唔會100%了解對方,何況單純一個鏡頭,我又戴上口罩呢!歌曲有少少回應番件事。」

Anson Kong又否認自己唔抵得兄弟獲獎,「我好戥我隊友開心,只係自己冇做好自己,應該先將自己失落情緒收埋,將恭喜情緒畀咗隊友先,呢個係我做得唔好。」自此他學習改善,不過人之常情難以掩飾:「任何情緒都係一下子,只要唔好影響到人就let it go啦。」自認性情中人的他,有時覺得性格「真得滯」,怕得罪人。正如Anson Kong所說:「個世界真偽點樣保持呢?當你好真去面對世界時,原來都唔允許,會被人抨擊。最矛盾地方,係相反你戴住面具好假時,人哋就覺得你好官腔,真假都被人批評,點解唔舒舒服服做番自己呢?」歌曲從他內心角度出發,現實中面對關口要真實保留自己,還是虛假帶面具展現人前呢?Anson Kong未有答案:「真係好大課題,自己仲拿捏緊。」

「好難靠12個改變樂壇」

MIRROR將於下月開騷無疑是喜訊,Anson Kong對唱功及身形大催谷,另一方面卻感受無形壓力:「第一個騷係出道一個月時,睇番唔係好滿意,大家都好幼嫩,而家出道第三個年頭,希望大家睇到我哋成長,大個仔咗。」同時展開操fit大計,密密練得6嚿腹肌:「好彩我唔使減肥,反而要增肌,食多啲肉,少食多餐唔使捱餓,但有時食得多都好辛苦。」準備隨時騷肌?他笑言:「想着衫好睇啲,騷肌要睇情況,如果好似張繼聰咁大隻,唔使着衫出街都得啦,邊會怕露?你睇佢不知露得幾開心,得閒又露吓手臂,得閒又着吓背心影相,鍾意佢早期有鋼條、胸肌、腹肌齊全,有佢個level就夠,男仔總係膚淺,夠大隻就騷得啦。」

疫情下接連拍劇做節目推新歌,Anson Kong謙稱︰「由《造星》玩比賽到而家我哋都係幸運小朋友,得到大家關注同喜愛,舊年疫情全世界好多工作停頓,我哋依然受關注,真係好珍惜,每次都諗(係)最後一次。」

早年觀眾狠批樂壇已死,近年MIRROR的誕生令人改觀,不少圈中人都睇好這班年輕一代,Anson Kong對推動樂壇仍有火:「真心希望成為推動香港音樂巨輪其中一個齒輪,樂壇好大,好難只靠我哋12個去改變,要配合好多人合作。知道大家都好出力,不論新人或前輩都有推出新歌,我覺得香港聽眾可以接受度再大啲,接受不同風格,近年都出咗好多年輕化不同音樂製作人,耳仔接受度可以再大啲。」身為跳唱男團成員,Anson Kong有感香港跳唱組合非主打,而自己聽歌領域很廣,接受融合曲風,他認為香港音樂作品不遜色於外國,善於玩結他、彈琴及跳舞的他目標在3年後推出個人創作EP。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner