麥貝夷再唱衰舊愛偷食好友 裕美成嫌疑人:唔好講啲又唔講啲

更新時間 (HKT): 2021.04.09 13:44

35歲麥貝夷曾唱《勾手指尾》紅極一時,上月底在IG爆seed,數臭拍拖3年的舊愛,斥其性伴侶多,出post當日強調是舊愛生日,而跟她曾傳緋聞的TVB小生翟威廉剛好當天36歲生日,擺明暗寸兼贈興。麥貝夷再爆舊愛曾搭上好姊妹,裕美無辜成為「嫌疑人」之一,慘被對號入座,她隨即否認此事。

裕美曾跟麥貝夷是好姊妹,今日接受《蘋果》電話訪問,裕美跟翟威廉相識多年,不知道他跟麥貝夷拍拖,裕美說:「唔明佢講前男友偷食單嘢,佢同威廉都冇拍拖,佢拍拖嗰個係圈外男友,我介紹佢識,男仔都冇偷食,我同佢熟都唔知佢有個拍過拖3年嘅男朋友,對上嗰個都係年半啫。翟威廉之前回應得好坦白,佢根本冇需要咁樣講明自己有短暫伴侶,我完全唔知點解麥貝夷要咁講。」

曾患抑鬱症的麥貝夷受這次情傷再次情緒不穩,裕美好心相勸說:「我相信佢完全需要睇醫生,有一段時間我同佢好friend,我講咗好多次叫佢去睇,佢話食西藥對身體唔好。」

裕美直斥麥貝夷的「暗示」令身邊朋友惹麻煩:「我係希望佢出嚟回應,講番引人懷疑單嘢唔係我就得喇,有嘢可以講直接啲,唔好吞吞吐吐,講啲又唔講啲,好多人受害,希望佢講清楚啲,否則唔好怪我。」裕美之前好心做媒,介紹男仔畀麥貝夷,不過裕美發現麥貝夷亦有不對的地方,曾直接提點卻令她不滿,裕美說:「唔知佢係咪咁嬲咗我,我同佢坦白直接講,佢話我鬧佢,其實我語氣冇好重,我當佢係朋友先直接講,以為呢個模式好多朋友都得,但有人受唔到。」

風騷嘆紅酒

翟威廉對於麥貝夷不停把事件無限loop,他今日凌晨回傳媒時說:「我的回應……冇回應。um...算啦。由件事完啦!」翟威廉不欲事件越描越黑,索性封嘴避談,但事件已把裕美扯落水,翟威廉可有甚麼說話跟裕美說,他答:「不關我事,冇嘢要講,冇回應。」

失戀的麥貝夷昨日在IG Story轉貼跟「綠魔」Karl風騷嘆紅酒的相片,她留言:「希望食餐好,可紓解心入面嘅鬱結啦,辛苦朋友們這段時間的輪流陪伴啊!」Karl今日回覆時直指擔心麥貝夷:「她情緒真的不太穩定,作為朋友,有聽她訴心事,也不希望她影響之後已接的工作及其生活,但感情事始終當事人自己才是最清楚。」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner