《Chill Club》出MIRROR迎戰《勁歌》 TVB低調簽《造星III》敗將Carman吸後生客

更新時間 (HKT): 2021.04.11 17:55

無綫今年不消半年大地震,高層變動極多,曾志偉、王祖藍、何麗全獲徵召回巢,李寶安、余詠珊、何哲圖先後離職。新官上任大幅度改革,曾志偉着眼重振綜藝節目,今晚終於與ViuTV埋牙肉搏。

ViuTV音樂節目《Chill Club》播出後,提供了新節目讓歌手上電視宣傳,當時TVB未與唱片公司破冰,星夢歌手「圍威喂」,又以無限輪迴的流行經典湊長者客。曾志偉上台後,TVB宣佈改革《勁歌金曲》對撼《Chill Club》,今晚9時半就播改革後的首集,節目上周二(6日)已錄影,嘉賓有張敬軒,其他有為《勁歌》錄影的歌手還有Gin Lee(李幸倪)、衛蘭、林欣彤、曾若華、許靖韻、林奕匡及馮允謙等。

ViuTV當然不會坐以待斃,今日《Chill Club》擺大頭以自家皇牌MIRROR及ERROR撐場,叫座力不比《勁歌》弱,之不過由於今晚ViuTV仍有《最後一屆口罩小姐選舉總決賽》,由晚上8時半播到10時,《Chill Club》比正常時間延後半小時,究竟中立觀眾會否轉台將成疑問。

有趣的是,《Chill Club》與《勁歌金曲》下星期仍未能分勝負,因為下周日(18日)ViuTV將會舉行「Chill Club 推介榜年度推介 20/21」,頒獎禮由晚上8時到10時半,完全覆蓋整個《勁歌金曲》時段,相信到時會是ViuTV「撳住砌」。

Carman:入TVB想演戲

兩個節目兩星期才見真章,不過今日有網民發現,TVB似乎留有一手打擊ViuTV,因為近日在TVB介紹女藝人的網頁上,竟然多了《全民造星III》的關嘉敏(Carman)。 Carman在2015年組成五人女子跳唱組合Bingo,去年在《造星III》廿強中輸了給陳葦璇 ,賽後評判之一的陳柏宇讚 Carman有潛力,又開IG live說想悔票改投Carman晉級。

ViuTV早兩屆《造星》賽事後,都被批評捧人慢熱,今屆特意在晚上7時半開節目《囝囝女女730》讓參賽者上鏡,不過59集節目中,Carman一集都沒有出現,似乎早有暗示其動向。

Carman今日回覆《蘋果》時解釋:「加入TVB係公司(天盟娛樂)安排,因為我本身係簽咗公司藝人約。好開心得到樂小姐(樂易玲)賞識,我聽返同事講,佢哋咁啱撞到樂小姐,樂小姐話好欣賞我,於是就有咗呢次合約安排。都好開心,希望遲啲有機會親自多謝樂小姐。」Carman說喜歡演戲,今次加入希望有演出機會:「我自己都有上好多戲劇堂,想喺演員呢方面發展。」本身擅長唱歌跳舞,Carman不想為演戲輕易放棄本業:「希望可以兩邊兼顧,我喺女團出身跳唱咗咁多年,希望兩邊可以一齊做。」

由於《造星III》參賽者們關係友好,早前Carman亦有與《造星III》朋友打邊爐,今次「半跳槽」,會否只是先兆?

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner