韓君婷為免朋友受騷擾申請破產 對蔡國威愛護之情:無以為報

更新時間 (HKT): 2021.04.11 14:53
(IG截圖/IG圖片)

現年45歲「鬼妹」韓君婷於97年「執二攤」成為亞姐冠軍,其後13年的人生路途在健康、愛情、家庭及事業上都接二連三遇到挫折,更一度欠債務高達40萬,近日決定申請破產,以正面態度面對前路。

面對申請破產一事,韓君婷接受《蘋果》電話訪問,她表示過去年半時間,美容院經歷社運及疫情的影響,她說:「美容院開開閂閂,大家都好焦慮,本來諗住轉一間公司可以穩定啲(收入),唔使擔心美容院生意,點知嗰間公司都面臨問題,所以冇做嗰份工。」面對困境,韓君婷仍樂觀面對,她笑說:「其實我一路歷程都山窮水盡,所以冇辦法先申請破產。」她指10年前患上抑鬱症後,經已將所有積蓄用在醫藥費上,加上之前媽媽病倒也花了龐大醫藥費,她說:「嗰時爸爸冇幫媽咪買保險,而媽咪身體太多病,保險都唔受保,所以我自己去承擔,嗰時都唔緊要,有工作每個月還都ok。」

保障朋友 申請保產

上年年尾因收入變零,不想欠債問題繼續惡化,到今年1月決定申請破產,她說:「破過產嘅人更清楚咁做(申請破產),係更加一定冇得走數,所有錢政府都有紀錄。」另一個申請破產的主因,就是希望保障身邊朋友:「唔會因為我暫還唔到款項,而去俾人騷擾,呢個係無辜。」她透露3年前媽媽過身後,曾經因為欠債而被騷擾,幸好上次短時間內找到錢歸還,今次不想重蹈覆轍而決定破產。

對蔡國威無以為報

與蔡國威同居近2年,問到威威是否給予很大支持?她感激地說:「其實威威係非常非常之好朋友,同埋好好人,真係好有義氣,我好珍惜佢。」問到威威是否沒有跟她計較租金等錢銀的事?她思考片刻說:「我只可以講佢係好有義氣朋友,無以為報。」另外韓君婷指父親現居於英國的養老院內,有專人照顧,父親也叮囑她不用擔心。至於好友梁思浩與李思蓓也不時關心她,及叮囑她要多進食,切勿餓壞身子,韓君婷指現時跟思浩做DJ外,又與思蓓拍檔開咪,感覺非常開心及充滿愛。

沒有輕生念頭

遇上財困,有否萌生過輕生念頭?她淡淡然說:「其實今次申請破產冇諗過呢樣(輕生),我人生經歷咁多,如果都能夠經過,咁今次只不過係破產。」她希望4年內結束破產令,而在破產消息傳開後,好多朋友聯絡她表示幫手留意合適工作。問到會否計劃重返幕前或返大陸發展?她說:「我希望有機會搵到穩定賺錢機會。」她承認破相是其中一個令她未能重返幕前演出的原因,另外是患抑鬱症時的行為也令人卻步,她說:「我會正面去面對,我而家返工會好努力、勤力同最有誠意去做。」至於會否找曾志偉幫手安排工作,她指志偉有好多仔仔女女要幫助,她不好意思騷擾對方。

其實韓君婷早於1月申請破產時,經已不時在IG分享正能量訊息,公開破產消息後,更引用名人的正面名言,及分享一張躺在床上微笑的相片,寫上「我就是我,我將盡力而為。」一切一切都顯示她以正面的心態去迎接前路。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner