黃德斌瞞妻陪舊愛放狗 直言對唔住老婆要跪玻璃頂痰罐

更新時間 (HKT): 2021.04.11 21:34

即將58歲的黃德斌爆出背妻孖電影幕後舊愛江玉儀(Ivy),兩個月內相約4次到清水灣附近的山路放狗,正印黃太Joyce表示不認識Ivy,黃德斌也承認未有向太太滙報行蹤,令事件更添神秘,黃德斌雖聲稱找Ivy做經理人,大家見面傾公事,不過卻孤男寡女揀一齊去郊外放狗,他們又是過氣情侶關係,難免令人懷疑他們藕斷絲連。

黃德斌爆今晚應Viu TV的邀請做《最後一屆口罩小姐選舉》總決賽評判,奉旨睇女,黃德斌爆出緋聞後首現身,他面對媒體追問,一笑置之:「好搞笑,我離開TVB就搵咗Ivy做經理人,我同佢都分開咗咁多年,不嬲關係好好,識咗30幾年。佢多數幫我傾嘢,佢熟啲,我梗係搵個熟番去幫我,剛離開TVB,出到嚟唔知搵個幫。」黃太Joyce卻認不出老公的經理人,黃德斌說:「太太未見過Ivy,冇需要特別要見,太太知佢做我經理人,只係冇見過面。」

這件「小風波」,黃德斌坦言事後有被太太提問,解釋過沒事。黃德斌續說:「佢(太太)唔介意。」記者笑問黃德斌可有跪玻璃,他笑言:「要啦,仲頂痰罐,係咪咁會好啲。」黃德斌認為始終太太是圈外人,突然被問記者追問當然未及反應:「嗰吓突然走埋去問佢有冇見過,佢又唔係呢個圈人,你叫佢點反應,我覺得對唔住我老婆,又要咁搞佢,我覺得唔舒服,你要問,走嚟問我。」黃德斌一再強調笑料一則,以後還敢孖Ivy放狗嗎?黃德斌說:「一齊放好唔好?今時今日社會係咪仲有人關心呢啲,大家當笑話,講真有嘢都匿埋啦!」

黃德斌今晚做口罩小姐評判,他的評審準則是最緊要個口罩靚:「才藝都睇吓,睇吓佢哋今晚發揮究竟係點樣?經過咗一段時間,由初賽到而家,整體身形都已經唔同咗,fit咗。我都有睇過節目,佢哋都有決心,真係用心去做,我又冇心水,睇佢哋今晚表現。」黃德斌也是第一次做選美評判,佳麗都會戴着口罩出來,也有泳衣環節,黃德斌說:「又唔畀我睇晒,要最尾先畀我見(樣),我都會睇佢哋眼,眼好重要嘅,你知有啲人眼好攝人,通常我會就咁睇,好少單一睇。」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner