Eric Kwok開檔玩德州撲克贏掌聲 無收入棄工作𥄫女自肥

更新時間 (HKT): 2021.04.11 07:00

郭偉亮(Eric Kwok)、劉浩龍(師兄)及谷德昭在閒餘時聚首玩德州撲克,想出趁疫情期間製作YouTube頻道節目《Round Table Poker》,邀請不同嘉賓來挑戰並推廣德州撲克運動,劉翁為其頻道擔任幕後製作。節目過去邀請了周秀娜、劉心悠、何超儀、王灝兒(JW)、蘇皓兒、陳葦璇、楊柳青及KB等任嘉賓,亦有邀請香港職業poker選手挑戰。節目沒有賭博成份,在淘汰賽中輸光積分便需接受懲罰進食奇怪食物。

疫情初期,Eric、師兄及谷德昭3人在家玩poker,想起拍片放到YouTube,節目源於去年他們到去北海道旅行,眾人同住一間大屋兩星期,Eric說:「咁啱嗰度有張poker枱,同依家個setup好似。」師兄說:「我哋嘗試去租party room,自己帶電話、相機、燈,拍出嚟叫Eric返屋企剪接,剪完之後原來完全唔好睇,冇牌型、冇字幕。」Eric隨後發現每次租地方,自己帶燈及多部攝影機拍攝相當煩瑣,之後發現劉翁有合適攝影場地,便提議一齊製作。

劉翁取笑他們初時拍出的片段甚為家庭式,他說:「由於每部機都唔同牌子,拍出嚟顏色都唔一樣,但我冇諗過可以用360相機拍攝。」劉翁表示自己只是幫手修正,最主要是同事們幫忙為每集嘉賓設計不同背景,他說:「何超儀就用好多唱片嘅背景,劉心悠就用全白色,好似仙女咁,有一集又玩kingsman就叫大家着西裝嚟。」

節目主要邀請靚女嘉賓接受挑戰,Eric解釋:「我哋站在觀眾角色去睇,咁多男人玩嘅game,自然想睇靚女,女仔都可以玩得好好,但係香港人未覺得呢個係一個運動,佢哋只係覺得係賭錢,依家開始多啲人玩。」師兄表示,不想有賭博感覺,想做娛樂感節目,他舉例指劉心悠、周秀娜,是完全不懂poker,但可以用10幾分鐘認識遊戲,他透露隨後有鄭融、薛凱琪、歐鎧淳、陳靜、楊愛瑾、蘇麗珊、余香凝、廖子妤及陳穎欣等任嘉賓,已為人夫的Eric笑言:「其實都幾開心,我自從識咗Grace(葉佩雯)之後都未見過咁多女仔,可以有咁多機會,玩game時可以見到佢哋真情流露。」師兄笑指Eric可以攞正牌整晚望女仔,他說:「平時拍戲都唔會,但今次拍一集可以3個幾鐘望到實,又唔會覺得尷尬,睇吓對方有冇講大話。」

這個自家製YouTube頻道,由Eric負責剪接,師兄負責與網民溝通、準備食物及接送女嘉賓,而Eric就爆師兄的前度鄭融一集表現相當火爆。過去除了玩poker,亦有拍攝其他主題,如邀請乒乓球高手JW比拼、飲食介紹等。而製作節目遇上最大困難是剪接十分花精神及時間,令Eric推掉不少音樂工作,在疫情期間犧牲所有時間為節目剪接,付出與收入不成正比,Eric說:「其實做呢個channel都唔係為錢,為鍾意做,又未試過,但唔知咁辛苦,不過身邊人都好支持,做得好開心,自己電視台,鍾意幾時播就幾時播。開心喺街好多人走埋嚟同我哋講呢樣嘢,好多人唔識玩poker嘅人,都變咗一種文化,好多本地職業poker玩家冇一個平台可畀佢哋上嚟,今次搵我哋傾合作。」Eric高興表示他們成為廣東話巿場唯一明星poker節目。

師兄曾建議Eric放棄,他說:「我同佢講過不如唔好做,因為佢負荷好大,我哋貪心咗,開頭逢星期一、四就出片,但我哋幾講承諾,每次點都盡量出到片,出完星期一嘅片,之後又繼續剪片,剪完又交同事整字幕,跟住星期四又出。」Eric笑言若星期四沒上載新片,他應該是入了醫院。

劉浩龍坦言,大概已拍了17集存貨,他亦要暫時離開4個月,外出接工作賺錢,他說:「雖然辛苦,但反應都唔錯,唔想反應好嘅時候又停咗,之前公司叫我返去又唔返,犧牲好多,而且係零收入,但仲係娛樂緊大家,而YouTube(收入)又唔夠我哋嘅製作費,所以真係可能會停。公司喺疫情曾建議開頻道,教人做運動、整嘢食、唱歌,其實好似得呢3樣嘢,遇到呢3個朋友,我覺得做得開心好多。」他們透露會計劃舉行poker比賽,或有更多搞作,劉翁說:「或者有派牌小姐競選,搵KOL、模特兒,發掘新人,將佢哋變成話題。」

攝影、攝影:仇志德、廖達燊

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner