15年後的秘密|歐倩怡童話婚禮背後悲歌 曾兩度小產靠家人扶持走出傷痛

更新時間 (HKT): 2021.04.12 00:30

歐倩怡(Cindy)在90年代尾憑卡通片櫻桃小丸子的片尾曲《問題天天都多》,「beli bala beli bala」唱到街知巷聞,開心、青春形象深入民心。出道10年,Cindy已被郭晉安「私有化」,1999年因拍旅遊節目擦出愛火,拍拖7年修成正果,2006年7月在迪士尼舉行童話式婚禮,當年Cindy只有26歲。

但原來童話背後,Cindy卻承受着無比傷痛,日前她在灣仔接受《蘋果》專訪,將15年前一直埋藏心底的秘密公開,「其實我係因為知道自己有咗先結婚,因為未夠3個月,大家都唔知,我啲親戚朋友暗地裏用咗20日去搞呢個婚禮囉,哈哈!因為唔可以搞得太耐,搞得耐又驚見肚。」可惜未到婚期,Cindy已經流產,婚禮是否如常舉行,Cindy心裏還是有猶豫:「嗰時我係臨擺酒先知道自己小產,我嘅心情係好忐忑,因為我係有咗先結婚,咁小產咗仲結唔結婚呢?但啲嘢都搞好晒,咁就結啦,哈哈哈……好多嘢好似整定。」

「或者同呢個BB冇緣份」

Cindy曾在2009年受浸禮上,分享見證,親述自己如何走出兩次流產的痛苦,說到傷心處,Cindy忍不住眼泛淚光,透露第三次懷孕,當胎兒3個月大的時候,有一天半夜肚痛,卻害怕自己會再次失去。如今Cindy已走出陰霾,將悲傷化為歡笑聲,她直言都要多得家人的理性分析和鼓勵,「嗰陣係有唔開心嘅,我有打安胎針,知道佢(BB)可能唔得,做咗好多嘢,但呢個世界係有汰弱留強,既然佢喺你肚裏面,個胚胎成長已經係有啲問題嘅時候,唔好夾硬嚟。我媽媽係資深醫護人員,佢會好專業用理性角度話我知,小產係會傷身,但夾硬生佢出嚟,在於父母或小朋友都未必係一件好事。嗰時我媽媽同我分析,我覺得都啱,咁就釋懷咗,既然上天畀我呢個考驗,或者同呢個BB冇呢個緣份,自己調節心理,自然排出咗,再慢慢調理身體。」

經歷過流產後,Cindy決定修讀營養學,一家人轉食有機及高營養食物,又戒食雪糕等生冷食物,調理好身體,最後終於成功懷孕,誕下1子令山,3年後再誕細女以雅,湊成一個「好」字,退出幕前,專心相夫教子。其間好學不倦,用10年時間完成了兩個學士學位,包括市場管理學及食物及營養學一級榮譽理學士, 最近又再報讀體育及運動營養學碩士及社區營養深造證書,問是否想給小朋友一個好榜樣?Cindy的答案竟出人意表,肉緊地握實拳頭笑着說:「佢(大仔)反而問我讀咁多書嚟做乜,你仲未讀完?點解你讀咁耐都未讀完,你幾時出嚟做嘢呀?幾時賺錢呀?!如果佢哋見到有玩具想買,我就話『冇返工,我冇錢,我啲錢係要留返買嘢食嘅』,佢哋知道阿媽冇錢,哈哈哈。」

兩個小朋友就讀國際學校,Cindy教導子女的方式較開放自由,從不打鬧,盼小朋友能獨立自主,「大仔已經13歲,仲高過我,由佢升上小一開始就冇跟過佢功課,亦冇請補習,乜都要佢自己跟返。細個實有錯漏,你唔記得就要你醜怪吓,從錯誤中成長,好過我成日哦住你,應該培養小朋友嘅責任感,呢個係佢嘅人生。」

營養學學士再到碩士

Cindy以身作則,不斷進修,但網上亦有haters質疑她會考僅得5分,狂花老公錢兼買學位,Cindy平心靜氣說:「多謝佢哋留意,其實我係一個鬥心好強嘅人,同妹妹完全相反,話我唔得就越要做畀你睇。以前細個掛住游水同唱合唱團,英文基礎打得唔好,初初讀Advanced Diploma in Nutrition(營養學高級文憑)係吃力嘅,雖然我個心想進修,但小產過後,又有咗BB,長輩會叫你唔好畀太大壓力自己,要舒舒服服休息吓。斷斷續續,誤打誤撞又信咗洪永城,佢話市場管理有用,花咗4年時間;後來又去城大讀咗大半年心理學,但發現自己冇嗰種天份同熱誠,最後又返去讀營養學,唔經唔覺咁多年。」

有老公做精神和經濟的支柱,多年來男主外,女主內,41歲的Cindy從來不介意老公郭晉安比自己大15年,認為愛情不分年齡,但由拍拖到結婚這22年,總會出現出一些婚姻危機,「佢之前有啲角色好dark,太入戲搞到個人好古怪,將性格同情緒帶返屋企,以前嚴重啲。好彩而家佢都演到爐火純青,小朋友撲過去攬實爸爸,靈魂就返晒嚟。」Cindy外表嬌滴滴,看似好柔弱,但其實性格比老公更加獨立,「我做乜都鍾意one man band,游水、讀書、打鼓、買衫都鍾意一個人;但老公就鍾意打網球,成日都要有人陪,需要多啲關懷嘅人。可能我係人馬座,佢係天秤座,但我真係需要各自有自己空間,我係太唔黐身,但可能佢第一日識我已經接受咗Cindy嘅性格就係咁。」

現在子女長大,Cindy亦可以騰出更多時間做自己喜歡的事,早前她跟馬天佑翻唱《問題天天都多》和《為誰哭泣》,並簽了新經理人,準備做網台節目。「我16歲考完會考,就去參加新秀歌唱比賽,好彩遇到《問題天天都多》,令有啲人認識我,如果冇呢首,可能喺街行過都唔知有歐倩怡呢個人。我嗰陣都幾半紅不黑,自己有責任,我普遍係比其他藝人懶,愛情至上,鏡頭後啲人成日問Cindy去咗邊?咪拍緊拖囉,後生嘛,乜都唔識。仲儍吓儍吓,以為結婚生咗小朋友就乜都唔可以做,但原來個個都可以繼續拍嘢,我而家都想追返自己事業。」復出後,Cindy仍keep住童顏,被讚有少女味,她笑說:「我落咗妝你唔知,有冇人追?咁大個郭生喺度,邊個敢追我!」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner