頻頻密會陪放狗 老婆:我唔識佢 
黃德斌與舊愛藕斷絲連

更新時間 (HKT): 2021.04.12 02:00

黃德斌在2018年與圈外女友黃美恩(Joyce),結束13年愛情長跑拉埋天窗,兩人結婚三年,卻被《蘋果》發現他疑與分手17年的幕後前女友江玉儀(Ivy)藕斷絲連。黃德斌連月來頻頻背老婆陪Ivy放狗,1月時更一周連見兩次。記者向黃德斌太太了解,她看相後斬釘截鐵說:「我唔識佢(Ivy)喎!」黃德斌昨日卻聲稱Ivy是他現任經理人,老婆也知情。

月底踏入58歲的黃德斌,在2018年娶比他細16年的女友黃美恩,夫妻生活低調而恩愛。今年1月14日,《蘋果》發現黃德斌揸車先送老婆到位於尖沙嘴的服裝店返工,之後他到商台接受訪問,不過收工後並沒返回與老婆的何文田愛巢,而是駕車到西貢相思灣一棟村屋,接載一名女子及其愛犬,齊齊到清水灣附近的山路放狗。事隔四天,黃德斌再次撇甩老婆,趁收工後密會中女到清水灣放狗,《蘋果》其後得悉該中女是黃德斌的幕後前女友江玉儀。

上月25日《蘋果》發現黃德斌依然不間斷地陪Ivy放狗,至本月1日,黃德斌再度接送Ivy,更由天光放狗放到天黑。單就記者觀察所見,二人近月來已先後約會四次,每次相處逾一小時。黃德斌每次出動,都會選擇在下午5時後,而且行事相當小心,其中一日,他疑似發現有記者追訪,即在迴旋處泊低車,待看見記者的汽車離開後,才將座駕掉頭駛走。

黃太孤獨購物

黃德斌和Ivy通常「人約黃昏後」,態度雖然未見親暱,但Ivy每次都十足開籠雀般講不停,笑容滿面步履輕盈,至於黃德斌在過程中雖然甚少出聲,但嘴角都會笑咪咪。二人每次放狗行山後,黃德斌均會送Ivy返到西貢村屋,才駕車離開。黃德斌頻密陪Ivy,相反黃太Joyce就經常一個人出動,《蘋果》在1月中便見她獨自到店舖購買電話配件,其間黃太煙不離手,買完後才返回由老公打本開設的時裝店。

前日《蘋果》到時裝店向Joyce了解,她看罷老公與Ivy的放狗相先是一愕,然後笑了兩聲說:「你哋係咪玩我呀?」仔細看相片後,她斬釘截鐵說:「我唔識佢喎!」被問到老公有否提起此事時,她說:「我唔知喎,佢冇提起過。」又表示夫妻關係OK:「佢成日都同啲朋友行山,呢個咁似劉嘉玲嘅,哈哈!」並指不擔心老公出軌,之後推說不方便上鏡,又用電話影低記者手上的相片,便匆匆返回店內。

做運動傾公事

《蘋果》前晚向黃德斌求證此事,他否認夫妻感情出問題:「哈哈,感情冇問題呀,Ivy𠵱家係我嘅經理人,呢樣嘢太太都知,不過佢哋未有正式見面。」黃德斌表示在2017年離開無綫後,找來Ivy任經理人:「我哋成日都會見面傾吓工作,因為疫情嘅關係,周圍都有限聚令,變咗好多時我會去西貢搵佢,橫掂都係要做運動,咪順便去放吓狗。」至於會否擔心太太誤會?他說:「唔會喇,成件事都係得啖笑!」

黃德斌昨晚為ViuTV節目《最後一屆口罩小姐選舉》總決賽做評判,被問到找舊愛Ivy當經理人,不怕太太介意嗎?他說:「都分開咗咁多年。」至於太太未見過對方,他則略帶尷尬說:「冇需要特別見。」記者質疑不見Ivy為他接工作,他解釋:「佢負責傾,傾完就交畀人,咁我梗係搵個熟嘅幫手。」

其實Ivy入行已超過30年,曾任多部電影監製和導演,圈中人脈甚廣的她,先後跟王晶和馬偉豪多次合作,參與過電影《賭俠》系列及《新紮師妹》系列,近年她為周星馳的電影任編劇,撰寫過電影《新喜劇之王》及《美人魚》等劇本,更同時擔任監製。

娛聞樂陪你走遍全球追星,即Like「娛果」FB 專頁!
BannerBanner