專訪丨劉威煌揭億萬駙馬的灰狗歲月 剖白:除非瞓天橋底否則唔要外家幫

更新時間 (HKT): 2021.04.13 00:02

娛樂圈有五位「億萬駙馬」:黎諾懿、袁偉豪、劉威煌、吳家樂、布志綸。前四位「駙馬」都出身大台,40歲的「巨聲幫」隊長劉威煌知名度最低,入行11年未出過唱片,但現在是擁3間奶茶店的老闆。

這天,劉威煌接受《蘋果》專訪,笑言是自己「運氣嚟」,跟太太結婚7年,對「億萬駙馬」稱號由抗拒到無視,劉威煌曾跟外父講明不靠外家,有手有腳證明自己實力,「畀個女嫁畀我係啱,我唔係諗啲謀住你身家。」

2014年結婚的劉威煌,太太林佳琪(Sandy)是富家女,有指娘家在大陸經營礦業生意,家住中半山並持有多個物業, Sandy本身亦有近億物業揸手。男人都是要面子,劉威煌言談間,不斷地想撇清「億萬駙馬」的稱號,「誤會太深嘞,如果真係,今日你唔會同我做到訪問,我會匿埋,正所謂人怕出名豬怕肥,哈哈哈,我都驚!」

劉威煌再三強調,似乎欲蓋彌彰,「梗係唔係啦,但都畀面寫到咁,我而家唔會當負面去睇,你話係咪係囉,我冇所謂,事實擺在眼前唔係。OK,我當佢係富家女,我而家做出嚟嘅嘢有目共睹,自己努力做生意,我心態就算外家幾有錢都好,真係如果唔係要瞓天橋底,我都唔會求佢,男人嚟嘅嘛,係咪先?少少膊頭都要有。而且我未識到女朋友前咁我點過先?唔通我死咗?我有手有腳餓唔死。」

要外父幫好面懵

雖然否認太太擁近億物業,但又強調不清楚太太有幾多身家,「我冇深入問過老婆有幾多身家,咁問好奇怪,外家聽到都唔開心。其實嗰時係有困擾㗎,外家都問我:『威煌搞乜呀?』始終我今日做緊所有嘢,同佢哋冇直接關係,佢哋係有做生意,我只可以講,佢哋可能中產高啲啲。我同外父傾得好清楚,希望靠自己努力,我有手有腳,一直對自己無論工作上、生意上都好自我,唔使幫,絕對零。好面懵㗎你諗吓,我外父60歲多啲,我都40歲,40歲人問個60歲求助好奇怪,呢啲係面子問題,我唔會寫包單話冇咁嘅需要,亦唔會斬釘截鐵咁硬頸瞓天穚底都唔投靠,我唔會,我覺得蠢囉!但有手有腳有能力,都畀外家一個安心呀,威煌可以靠自己努力做到,亦代表住畀個女嫁畀我係啱,我唔係諗啲謀住你身家。」

威煌和太太拍拖7年、結婚7年,經歷了兩個七年之癢,跨過風浪踏入15年,「我好乖嘅,係異性絕緣體,冇女仔鍾意我,唔知係咪我煩。我同老婆見面時間多,身邊朋友大家都識,想曳曳都曳唔到。風風雨雨鬧交一定有,鬧得最大係自己懶成日瞓喺屋企,因為我有段時間『灰狗』,冇乜方向目標,舊公司又解約,日日匿喺屋企攤屍,嘈到好大,差啲面臨要分開,佢斬釘截鐵話我再咁落去,冇可能再一齊,距離太遠,一個喺度行緊,一個停咗,過多半年死硬,人之常情,當時佢點醒咗我。呢件事我幾感恩,我都覺得自己幾叻,起碼醒到冇放棄自己。」

經過考驗的感情更堅固,問太太在他心裏的位置?威煌笑了,「No. 1,冇得揀,亦都迫住我講,哈哈,一齊咗十幾年,跟住嘅路,今年運氣比上年好,生意上捱得住,有《蘋果》做訪問,運氣嚟,做到最好,相信天無絕人之路。」

入行11年冇出過唱片

回想那段灰狗歲月,29歲入行發歌星夢,在大台等了4年,只有2首合唱劇集歌,終於解約離開,「坦白講,純唱歌喺電視台係難嘅,你見到好多都係幾線發展,你話我儍仔又好乜都好,我係幾堅持嘅,只係想唱歌啫,公司有提議過:『威煌,不如你再入藝員訓練班。』我係嚇一跳嘅,嗰時年紀都唔細,再入訓練班乜料呀,我想唱歌咋!嗰時係好多矛盾亦都諗唔通,其實我喺TVB都係4年,簽經理人合約接出面工作,同公司拆賬,嗰時有錢搵㗎,但問題係有《超級巨聲》2、3,慢慢越嚟越少工作、越嚟越淘汰,我又keep唔住人氣,到咗第四年辛苦咬老底難搞啲,同公司深切傾過,我真係希望以唱歌為主,大家一人讓一步,你放我走,好和平開心離開。」

之後轉簽林盛斌成立的棋人,出過幾首單曲,約滿後離開,至今入行11年,仍然冇出過唱片,「嗰張只係派台碟,未叫做一張碟,以前自己可能都會:『吓,做咁耐歌手都未出過一張碟!』而家心態冇乜所謂,因為世界已經digital,我覺得有啲歌手都係出咗碟冇人識,亦都可以掉轉諗,原來大家都覺得我係歌手喎,原來我冇出碟戥我唔抵,我覺得呢個仲好。」

去年4月開始,威煌逢周五在社交平台開live唱歌,滿足自己的唱歌慾,「其實我3、4年前做過一次live,直程搵埋樂手,但都唔超過30人睇;今次可能疫情關係,大家困喺屋企,由40人到最高峯3,000人,我睇住呢件事進步,令到我更加想唱,一個歌手無非都係想多人聽,見到咁多人支持,好開心。本來冇諗再闖樂壇,純碎娛樂啫,至於有冇獎項、係咪紅館、我係咪樂壇一分子,我係一啲都唔care,大家可以唔當我係歌手,我亦都唔介意冇呢個身份,我只係一個鍾意唱歌嘅人。」

對唱歌忠誠的他,憑着開live儲到一批知音人,終於圓了他的唱歌夢,將於本月底自資開騷,「點解今次開,原因唔係我好多作品同大家分享,成個動機係我上年4月開始做直播,一段時間之後,網民希望我開騷見面。」處男騷在旺角麥花臣場館舉行,貴飛880元拍得住紅館價錢,「冇辦法,以前開演唱會可能有老闆支持冠名贊助,開銷方面容易啲處理,但今次我好唔同,羊毛出自羊身上,先唔講其他雜費,最大嘅兩樣:台燈聲加場租已經4、50萬,你諗吓,如果我賣380元或480元,可能好似聽落合理啲,但實際上連本都唔夠,所以我同大家講得好清楚,今次掉番轉,先畀錢買飛,夠錢先開,概念似眾籌。」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner