反擊志偉踩ViuTV Ig一日吸逾二萬粉絲 
193@ERROR敢言人氣升 獲封娛圈清泉

更新時間 (HKT): 2021.04.14 02:00

現年31歲的ERROR成員郭嘉駿(193)憑2018年ViuTV節目《全民造星》中搞笑騎呢形象突圍而出,最近更因率直又敢言的個性而人氣急升。事緣無綫繼醜化姜濤後,曾志偉於大前晚《開心大綜藝》開播前受訪,明踩ViuTV收視只得4點、題材偏門,事後193反擊無綫︰「收視點得嗰幾百部電視機。」敢言獲網友力挺,還被封為「娛樂圈的清泉」,人氣急升,其Ig賬戶追蹤人數一日急增逾二萬達至11萬人,認真厲害。

氣勢如虹的ViuTV,近年贏盡口碑,反而無綫收視暴跌,連大股東黎瑞剛都鬧爆無綫節目老化,豈料大前晚播放曾志偉與王祖藍回巢後推出的頭炮新節目《開心大綜藝》,仍然被觀眾批評故步自封,曾志偉又於節目前拜神時,受訪寸ViuTV收視得4點、題材偏門,稱只能與旗下J2台比較,同日晚上ERROR在《最後一屆口罩小姐選舉》總決賽前被問到此事,成員193即隔空反擊:「收視點得嗰幾百部電視機,我哋不嬲都唔介意」、「佢哋係畀老嘢睇嘛」,又寸J2節目係「冇記錯係咪40幾歲仲話後生仔傾偈嗰個」,明顯劍指無綫節目《#後生仔傾吓偈》中41歲的陸浩明。

家明:ERROR裏轉數最快

193不平則鳴,連作家家明亦於fb讚揚他說:「193的直率,是娛樂圈的清泉。我寫包單,193口中的每一句回應TVB矮肥短的說話,沒有一位仍想在娛樂圈發展的藝人敢講出口。因為,矮肥短代表着的,是一種可以封殺人的勢力,或者他一句說話,可以令你少了機會,接少了job。」又指曾志偉活在同溫層中,故沒法得知真相:「現在已不是他主導的80、90年代,歷史洪流之中,他才是過氣,他才是弱勢。我比較喜歡193的真性情,鏡頭前飾演自己,說着他想說的話,亦是ERROR裏轉數最快的一位。」

而193霸氣反擊無綫後,亦獲網民以行動支持,Ig賬戶追蹤人數一日急增二萬多人,截至昨晚9時已有11萬粉絲。有網友支持他講真話,認為無綫抽完姜濤水再踩節目偏門乃先撩者賤︰「曾志偉喺薑茸事件之後都唔認錯」、「一開始懶寸咁話人得4%收視,又話人題材偏門(暗示自己扮女人大眾化),俾人寸返轉頭只係自己攞嚟」。但亦有網民認為193「講得太盡」,擔心會對他日後的演藝事業帶來負面影響。

193:我係對事唔對人

對於反擊寸爆無綫至人氣勁升,193昨日回應時避忌說:「暫時唔方便回應太多,整體想講,我係尊重所有前輩,我講嘅嘢只係對事,唔係對人。」其經理人花姐似乎怕他得罪人,昨於旺角出席MIRROR活動時表示會聯絡193,並指身為公眾人物就算講真話都要有禮貌,「呢個係佢性格,佢可以當眾話『花姐你好肥』,我明白佢係冇心。」有網民擔心193的言論會使他在娛圈被志偉封殺,花姐說:「老爺(曾志偉)係一個好大方嘅人,我諗佢唔會嘅,同埋193咁高,可以避開老爺嘅視線,等我得閒打畀老爺先,我覺得佢明白嘅,如果佢了解193嘅為人就知道佢冇心。」MIRROR的Lokman也幫口:「193自己都成日講『你知我咩料啦!』佢有時係口快快,又成日癲癲得得,係有少少唔尊重,但係都部份正確吖!佢講完呢番說話之後,兩個台都多人留意咗,所以都係件好事。」

因193人氣升,連帶ERROR舊作被翻loop,有網民將《花姐ERROR遊》舊片段放上網,當時193連經理人花姐都冇面畀︰「犀牛阿花生得大隻、又重,壓到人哋唔知點算」,又直指她脾氣差︰「阿花你有時又唔應該咁暴躁,你身邊啲同事都會唔開心」。最激一次是他幫犀牛「阿花」擦背時話:「作為經理人,你又唔算好稱職,成日掉低你啲藝人,都明白你一家大細,好多人要照顧。」其實193真是初生之犢不畏虎,2018年他拍《肥仔大冒險》時亦試過膽粗粗自稱韓星,到將軍澳的無綫電視城門外挑機,要求保安讓他入內,又即場唱歌跳舞,十分搞笑,網友邊笑他癲邊讚他「喜劇感好强」。

娛聞樂陪你走遍全球追星,即Like「娛果」FB 專頁!
BannerBanner