《愛‧回家》植入「國家安全」洗腦 陳榮峻兒子:唔會叫執X咗佢

更新時間 (HKT): 2021.04.14 17:03

無綫處境劇《愛.回家之開心速遞》去年驚現「五一」手勢掀起風波,長達14秒,頓成網民熱話,搞到藍營發起罷睇TVB,事後TVB更以涉國安法威脅導演辭職,為咗修補撕裂,被嘲CCTVB的無綫當然要識走位,噚晚忽然九唔搭八,講起植入廣告「唱好國安」,宣傳埋全民國家安全教育日,令不少網民側目,斥TVB擦鞋同表忠程度達到「神級尷尬」。

噚晚嗰集演譚道德校長的陳榮峻跟演女兒Bonnie的林凱恩在家寫大字,舉起個「安」字,譚校長即發表偉論稱「國安」同「家安」必須相輔相成,對白再講「須知有國才能有家,要國安,家方能安,國安家安」,又指「國安」涉及國土、政治、軍事等範疇,國家安全,還包括經濟、文化、社會、科技、網絡、生態安全等,又指「國家安全先可以保障到大家生活」。資訊量多得嚟,仲相當hard sell!

接着Bonnie反問:「但去到國家安全咁高層次嘅嘢,又關我哋呢啲一般升斗市民咩事?」譚校長仍然死撐:「我講嘅所有範疇跟生活息息相關,試想想如果冇經濟安全,你哋喺銀行啲錢儲嚟去旅行嘅錢就冇保障,食物安全冇保障就會病從口入,冇辦法上班上學,生態唔安全就會受污染破壞,影響所有人嘅生活同健康。」把「國安」扯到離天萬丈遠,之後譚校長再翻兜一句:「所以先要國安才能家安!」

最離奇就係Bonnie無啦啦講:「我知道後日係全民國家安全教育日,到時再同你傾國安家安。」國安植入式廣告長達2分半鐘,令網民反感,怒罵CCTVB硬銷手法令人生厭,建議下次不用再搵所謂嘅首席創意官王祖藍扮「777」,可以直接叫林鄭客串《愛‧回家》。

陳榮峻兒子:咪x搞笑啦!

而陳榮峻兒子陳熲聰凌晨在IG稱收到好多朋友訊息談及此事,並在IG作出回應:「咪x搞笑啦,又話唔睇,又幫佢宣傳,TVB都叫做養大我,唔會叫汁(執)X咗佢嘅,變做第2個亞洲(電視)捱多10年啦,各位朋友有心啦,唔使再send畀我,del都有排del,你哋send完畀我,我都唔會做啲咩,同埋我真係冇再睇TVB,所以send完過嚟,我都只係一個問號,另外我惟有再努力啲養起佢哋啦,當然都歡迎阿姨養起埋我。」

此外,其實全民國家安全教育日網頁並沒列明食物安全屬於「重點領域」,《香港國安法》也沒提及「食物安全」,大陸人民網只講過「中國的糧食安全」,講緊是糧食安全預警制度,保障糧食供給和質量安全。未知TVB度稿人有否過度解讀「國安」呢!?

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner