專訪丨Alina全靠《造星III》帶挈有運行唔嫁住 讀演藝窮到燶戶口餘額唔夠100蚊

更新時間 (HKT): 2021.04.14 06:00

ViuTV節目《全民造星III》十強之一的Alina(前名李靜蓮,現改名李炘頤),出道時是巨星紅館開騷時的舞蹈員,因為一場真人騷,令她有機會走在台前,雖然30歲才得到這個機會,但Alina不認同自己起跑太遲,她日前接受《蘋果》專訪時說:「遲係有原因,就算好早畀咗機會我,我都會嘥咗,我覺得而家係right timing!」

Alina曾吐苦水去年參加《造星III》時耗盡6位數字積蓄:「我相信搵得返嘅,所以我敢使,之前參加過比賽,我知道喺參賽嗰半年好難出去接嘢做,要有彈藥畀自己,突然有呢個機會我咪去玩。幸好前兩年好努力去搵錢,咁就可以做自己想做嘅嘢。」Alina笑言積蓄未花光:「仲有嘅,《造星III》之後,我都幸運接咗好多廣告,算好lucky。」Alina自爆讀演藝學院時,經常是「月光族」:「我真係試過銀行戶口使剩90幾蚊,要叫媽咪入10蚊畀我,先撳到100蚊出嚟,講出嚟真係幾核突。嗰時做學生,我冇做part time,每個月零用錢都使晒,學費上我有拎獎學金幫補。」Alina畢業後便做演唱會舞蹈員,因為沒固定演出,收入不穩,出糧又會要「追數」,其後再做埋兼職模特兒賺錢為生,參賽《造星III》為29+1的她標尾會。

簽約ViuTV獲力捧

Alina因為人氣急升,ViuTV決定肥水不流別人田,跟她簽約力捧。「我係開心嘅,畀自己一個新突破,我一直好想演戲,拍劇或拍電影都好,希望可以將自己嘅經歷放入角色度,然後發揮出嚟。又想試吓做主持,我覺得自己講嘢唔夠叻,希望有機會改善到,又練吓轉數快啲,以前覺得唔想做嗰啲,而家人大咗,乜嘢都想試吓。我同公司溝通咗,乜都試吓,冇話特定一定要喺邊一方面發展,我嘅目標係試晒咁多嘢先,多元化。」

Alina加入ViuTV大家庭,跟男友、MIRROR成員邱士縉(Stanley)或有機會合作拍劇,不過她先此聲明不想做「螢幕情侶」,「現實都已經係情侶,拍戲又做番咁好悶,不如做敵人,平時我有時都夾住佢,最多做戲畀佢夾番住我,做戲畀佢威番次,我平時唔會小鳥依人,做戲可以做吓!」兩人當年做舞蹈員便認識到相戀,今年剛好10周年,彼此互相支持鼓勵,現在一齊跳入幕前,各有發展和機會,見面時間比熱戀時減少了,他們反而更珍惜相聚時間,Alina坦言:「少見咗面,係會令我哋更加掛住,更好感情,有句說話叫『小別勝新婚』,少見啲係好事。」Alina表示曾考慮過的婚期就要順延,「以前大家會諗多啲結婚嘢,呢兩年我目標清晰咗,我想衝線,將佢放埋一邊,我會想同居,而家大家事業都剛起步,衝咗事業先。」

想做楊紫瓊2.0

問到Alina最恨演甚麼角色?她衝口而出:「我好恨做打女,但一直冇呢個機會。我覺得自己body language係最叻,好想將佢表現出嚟。我視楊紫瓊係目標,希望成為第二個佢。」Alina的舞藝高強,她明白此舞不同彼「武」,為練身手,她近日積極操拳,「我好耐冇打boxing,跳舞力度同打拳係完全相反,踢腳我冇問題,但手部力度好軟弱,要做番多啲訓練去令身體習慣力度點去郁同打。前幾日去打拳,手無力似貓打拳。 」因為出拳時拳揸唔實,結果手指發生「篤魚蛋」,手指腫了足足一星期,十指痛歸心。

Alina早年在演藝學院學舞時因為壓力太大,曾出現抑鬱狀況,近年Alina找到適合自己的減壓方法,「以前迷惘嗰陣時,我好少搵朋友傾訴,唔希望麻煩到人哋,我會困喺屋企,臨瞓就會大喊一場。呢兩年,我學識咗睇書減壓,屋企好多心理同哲學書,唔開心時會求其拎一本揭一頁去睇,當係上天畀我嘅指示𠱁番自己,我會用睇書去消化件事。而家人大個咗喊少咗,唔做喊包做書中蟲,我或者唔係好識表達自己,所以呢個方法係幾work!」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner