add名人時尚 | 陳葦璇六歲愛上舞台 五年音樂路兜轉未算低

更新時間 (HKT): 2021.04.15 02:00

天下沒有「懷才不遇」這回事,只要裝備好自己,總會遇到發光發亮的機會。現年25歲的陳葦璇於2015年加入女子組合《As One》出道,隨後解散,開始以跳唱歌手身份作獨立發展。去年底ViuTV的《全民造星III》,參賽者每一次有笑有淚有汗水的表演,令節目掀起話題,當中陳葦璇每次都帶來強勁有力的歌舞表演,成功搶佔三甲一席位。

【從迷失變得堅定】

由女團《As One》到《全民造星III》,由青春少女的「陳嘉茵」,到揮別長髮,變成眼前一頭瀟灑短髮的陳葦璇,五年間的經歷與轉變,令她從迷失變得更加堅定。陳葦璇日前受訪時,形容比賽令她成長,更清晰自己的定位,也發掘了更多心靈上的感受,她說比賽前擔心與憂慮較多,「一來疫情影響好多plan好咗嘅事,二來我都一直搵緊自己方向,有少少迷失,處於擔心比較多,所以先想不停試新嘢,我都好多謝呢個比賽畀咗好多曝光率我,𠵱家因為多咗人認識自己,憂慮少咗,唯一要做好,就係唱歌、跳舞,做好原來最基礎嘅嘢,分享畀大家就夠。」

【帶起家中短髮潮】

陳葦璇在訪問期間,說到短髮更能代表她時,分享了家中趣事,「我阿媽都係咁短頭髮,以前成日叫我剪短,然後有一日我真係剪到咁短,佢見到『吓!竟然咁短!』 佢好驚訝,然後我仲越剪越短,兩邊都剷短了,我仲帶起屋企嘅短髮熱潮,爸爸𠵱家係光頭,哈哈。」

雖然曾經歷過解散、迷失,但陳葦璇笑指因為這個世界總是「低處未算低」,所以不認為自己曾遇上低潮,只是未達到目標,「有人曾經問我點解咁樂觀,其實我唔係樂觀,只係比較知道自己想要嘅生活,咁就定一個目標去達到,唔係話我要做億萬富豪,而係事業上,我要出到幾多首歌,又或者你想結婚,都可以係一個目標,set好目標就一步步做好佢,如果未做到,只係付出嘅努力未夠多。」

【六歲開始愛上表演】

相信只要曾經看過陳葦璇的表演,那種自信與從容,都會覺得她有種天生屬於舞台的感覺。從六歲開始她便愛上表演,「小學有中國舞班,要精選先可以參加,老師喺操場教咗一小段舞,學完之後跳畀佢咃睇,我被揀中咗,由嗰時開始鍾意喺台上跳吓跳吓嘅感覺,都畀咗一個好嘅開始我。」之後學習拉丁舞、Jazz Funk,到中學參加比賽接觸唱歌,自此與「唱跳」結下不解之緣。雖然參加過無數比賽,擁有很多經驗,在台上總是一副信心爆棚的模樣,但她也曾「淆底」過,「當時好驚我就會深呼吸,同自己講『冇事嘅』!一次過爆出嚟。」她分享心得謂,越驚越要望住評判對眼,就會得到自信分。

【新歌講迷茫失落】

今年陳葦璇帶來了首支有份創作的單曲《本日終了》,用歌詞描述去年迷茫與失落的心情,「如何被外在環境影響底下,我都會找尋新方向,例如首先要改變自己,先可以改變之後嘅路,闖出一片天,正正因為過去嘅迷茫,先至令自己更加成熟。」之後她會與監製JNY再聯手合作帶來更多新歌。

髮型:Melody Chiu

化妝:Larry Ho Of Aveda IL COLPO

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner