陳欣欣轉職古天樂配音公司 難忘周星馳監場配《新喜劇之王》驚到喊

更新時間 (HKT): 2021.04.15 00:00

說起陳欣欣可能大家都會想起,她是有線體育台的主持,再追溯之前,她是亞視鼎盛時期的節目《今日睇真D》主持之一。當亞視消失在免費電視台、有線體育台亦風光不再之時,去年遇上疫情同時離開了有線的陳欣欣,卻找到另一個契機,加入古天樂旗下的天下一聲優館擔任配音員工作,稍後又為港台節目《守下留情》做嘉賓主持,一試當DJ的工作。

投身配音員

早前陳欣欣在觀塘接受《蘋果》訪問,談起她無心插柳下轉職當上配音員,「我喺有線係員工合約,做咗咁多年,連體育台都摺埋。過往我一得閒就去搵周恩恩(配音導師)上吓堂,之前上過初班、實習班,後來又掉低咗,有好多嘢我都唔識,又去上返初班。舊年周恩恩同我講公司有規模咗想簽人,不如簽我哋啦,咁啱體育方面少咗工作,忽然有條路打開畀你,就係咁就加入咗,好順其自然咁行,但我又唔係完全轉職幕後,如果有幕前嘅工作,有機會我都會做。」

近日陳欣欣與一班老中青的配音同事拍起短片來,片中他們玩遊戲時更打成一片,陳欣欣坦言與他們相處,連自己都後生了,「young咗?絕對係啦,做主持要投入件事就要玩埋一份,而且我把聲好尖,希望班後生仔接受到我,大家一齊玩就要投入。」

被周星馳嚇到喊

配音工作,對陳欣欣來說是初哥,談起最難忘的配音經歷,不得不說那次為周星馳電影《新喜劇之王》配音,她說︰「戲入面男主角王寶強去接受電視台訪問,我就係配嗰個女主持,其實對白唔係好多,我第一次去已經做晒,當時周生冇在場。後來話未夠好再去配,只係分幾鐘嘅對白,最終錄咗兩個鐘。」

陳欣欣形容當時她一個人站在偌大的錄音室,聽到在外的6、7個人在說話,包括周星馳,反而令她更緊張,「我耳仔一路聽到佢哋對話,對白要點講,傾好咗要我即刻講一次,一時間自己好似傻咗咁,呢句我係咪要跟住咁講呢?其間有一下周星馳仲話:『我同你講嘢呀,你聽唔聽到呀!』語氣有少少惡惡哋,嗰一刻我已經被嚇親,後來我先知原來佢係咁,冇惡意。」

不過陳欣欣一直忍住心中那股緊張情緒,即使完成了配音,當時周星馳一臉cool樣連一句「OK」、「收貨」都沒有說過,令她更緊張。她離開錄音室時,一度跟星爺擦身而過,她反而有感如釋重負,「終於無驚無險完成,到我離開時,上到自己架車度就爆喊。我份人係要用喊嚟減壓,成件事好緊張,一直hold住個情緒,一直忍住,唔希望影響到工作,硬住頭皮谷住。嗰次我足足喊咗半個鐘,我係好喊得,後來有段時間諗返起件事,我都仲想喊。」

用聲音來演繹

今年49歲的陳欣欣,當年仍是中學生的她,參加港台舉辦《聽歌學英文》的歌唱比賽,及後獲黃一山推薦參與節目《笑聲救地球》演出,一度被無綫睇中向她招手,奈何當時未完成中學的她,最終作罷。到中學畢業後,陳欣欣曾當了3年旅行社文職,始終對演藝工作未放棄的她,於1993年參加第12屆新秀歌唱比賽,同年又參加亞視《未來偶像爭霸戰》、電視新星大賽,之後順理成章加入亞視當藝員。

當年她因為喜歡唱歌而參加比賽,沒想到今時今日,同樣以聲音繼續演戲。談起她入行30年的演藝路,她自言是個幸運兒,「我覺得都幾神奇,當年參加歌唱比賽,因為未讀完書冇入行,之後做咗文職,後來再參加新秀又因為失聲,轉折又去參加電視新星。入咗亞視做《今日睇真D》,有時會拍吓劇,做咗6年約滿,嗰時有好多登台、廣告都幾好執,自己野心又唔大,生活總算唔使愁。後來又有有線歐洲國家盃要搵個主持,忽然又有新路向。」

當了近20年的體育主持,沒想到又有配音的新路向,「前輩話齋,你仲留喺度總會有你嘅機會,娛樂圈就係鬥長命,你唔放棄,條路都唔會放棄你。冥冥中係有主宰,而且我份人野心唔大,又唔大貪,只係想做個平凡嘅藝人,有個機會想話畀大家知,其實陳欣欣仲喺度。」

閃婚更長情

那些年陳欣欣做體育主持,不但開闢另一條路,還覓得好歸宿。她因工作關係認識了前香港足球代表隊球員、足球評述員何輝,兩人相識僅半年,於2010年閃婚,至今快踏入結婚11周年。談起夫妻關係,陳欣欣甜笑謂︰「緣份真係好得意,我從來都唔恨嫁,又唔強求結婚、生仔,我份人好隨遇而安,信緣份,嗰個人係就係。」

她回想30歲那年,前輩鮑起靜曾跟她說過,「鮑姐話人點都要結一次,好醜都結吓;咁佢又唔係壞人,大家相處到,佢又想同你結婚,咪結囉!」問她夫妻相處之道,她說︰「大家客客氣氣,唔好要求佢做啲乜。我唔鍾意鬧交,何必鬧交、反臉呢?如果佢發脾氣,咪唔好睬佢,如果佢都唔記得,就唔好講返,大家唔睬幾日咪冇事。好多人可能要保鮮,但呢種方法啱唔啱你呢?我唔需要驚天動地,都快50、60歲啦,個心臟都負荷唔到啦。」此刻陳欣欣深深體會,不論演藝事業或是婚姻關係,對她來說平凡是福。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner