視后李佳芯唔介意再被力捧 朱敏瀚冇聽過「新五虎」

更新時間 (HKT): 2021.04.15 20:07

近年TVB的綜藝節目被ViuTV打殘,大台即急召曾志偉回歸出任副總經理挽回頹勢,重返大台的曾志偉亦決定大肆改革,除了與三大唱片公司「破冰」外,更推出綜藝節目撼ViuTV《口罩小姐》,而最近亦有報道指大台將會力捧「新五虎」及「六大花旦」來力撼ViuTV。

冇聽聞有六大花旦

今日被指是力捧對象的李佳芯及朱敏瀚等在將軍澳出席活動時,李佳芯對於被指是六大花旦之一,她聽到後表現愕然的同時亦表示沒聽聞過,提到她早已貴為視后仍然被力捧?她說:「如果真係其中一個,我都會開心。得過獎唔應該係限制,如果有幸係其一個都開心。」

至於被指是「新五虎」之一的朱敏瀚,他承認已排了很多工作,但就沒聽過會被力捧,「公司冇正式同我講點點點,但嚟緊係陸續有好多工作在身,好多謝大家畀呢個名我哋,無論咩名,都要做好自己。」問到會否怕觀眾將他們與以前的五虎比較,他說:「「冇得比較,舊五虎我都好鍾意。總之一係唔好接,接咗就盡力做好佢。」而朱敏瀚更指五虎中最欣賞的是劉德華,皆因對方很勤力。

蕭正楠自認「低層次」

同場的麥美恩被指將會夥黎耀祥、鄧萃雯拍重頭劇,她表示自己也是看報道才知道,「打過電話畀監製,佢話而家係好初步階段,角色、劇本都係安排中。」問到若真的參演,拍住視帝視后是否會有壓力,她說:「有機會參與對演員係好發揮同機會,而家練好個底,唔想嘥咗個機會。」而麥美恩又表示入行後很幸運,皆因可有機會做節目之餘還可以拍劇,而她亦希望自己能越做越好,而她亦慶幸自己的角色跟劇份越來越重。

對於李寶安將在5月退休,蕭正楠表示平常只會在公司的大型活動才會遇到對方,而自己屬「低層次」所以未收到對方離任消息,李寶安退休消息出現後無綫股價回升,陳瀅就驚訝地話:「係咩?我哋都要快手!」而蕭正楠即話:「買遲咗添!」問到蕭正楠對公司前景有甚麼看法,他說:「其實啲新節目出咗街,大家個反應都幾唔同,好似有番以前大家庭個感覺,我哋公司好耐冇做Live,有呢啲新突破其實係好事嚟。」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner