Ian奉旨與Amy情侶檔傳情 毋須私縮:拍拖唔影響工作

更新時間 (HKT): 2021.04.16 00:30

男子組合MIRROR成員陳卓賢(Ian)在去年年底被爆戀上墨西哥混血索模盧慧敏(Amy),兩人訂情之作《無限斜棟有限公司》已經播出,這對小情人近日「攞正牌」拍住拖做宣傳。兩人早前與同劇主要拍檔黃定謙在九龍灣接受《蘋果》訪問,雖然當日「三人行」,但依然不難感受到這對小情人戀得火熱,經常見到兩人眉來眼去,旁人亦似乎習以為常,習慣了兩人的相處模式。

《無限》播出一個星期多,每集片尾都有爆笑花絮,當中Ian與Amy的蝦碌鏡頭背後,總是有種甜絲絲的感覺。根據黃定謙在訪問時的說法,3人在拍攝初期已經「玩得好埋」,3人之間的行為亦變得「好兄弟」,他說:「大家拍呢套劇都好辛苦,每日捱更抵夜,可能係18、19個鐘,有時我都會叫Ian幫我按兩下,又會叫Amy幫我按。」然後3人相視而笑,情況就如每集後的花絮一樣。黃定謙說當時不知道兩人拍拖:「我本身都唔係好覺,直至佢哋同我講,我都好戥佢哋開心。我就好似一個爸爸咁。」不過這位「爸爸」,今年只有25歲,比起Ian與Amy,還要年輕兩年。

戀情曝光後,外間頗接受這對「歌手與模特兒」情侶組合,Ian說:「呢樣真係要多謝大家,好正面咁支持同祝福,我哋開心,大家都會好開心,真係好感動。不過最初都冇諗話會有啲乜嘢特別影響,我本身嘅諗法覺得自己都有咁上下年紀,拍拖都係好正常嘅事,最緊要係唔會影響到工作,事實上我哋都想大家知道,我哋一直對工作好認真,唔會因掛住拍拖而影響工作,我諗呢啲大家都會支持。」

本身Ian是MIRROR成員之一,甫出道已經吸引了不少「鏡粉」,Amy今次成功「私有化」Ian,會否感到大壓力?她笑說:「唔會喎,反而係戥佢開心,我哋啱啱拍劇嘅時候,有好多fans嚟探班,佢哋個個拎好多嘢嚟支持,嗰陣我哋仲係朋友,但都覺得佢哋好好,我哋都有份受惠。覺得做得咁辛苦,有人支持一定開心,直到後期有所發展,我哋要再努力啲,要將自己變得更加好,希望唔會負大家對我哋嘅祝福。」

當日戀情尚未正式公開,Ian被爆暗撻「爆粗港姐」陳曉華,接着再傳他私有化Amy和同劇拍檔余潔滢,加上與ViuTV一姐陳俞希及蘇皓兒都傳緋聞,結果他被封為新一代女神收割機,直到2020年的最後一日,真命女友Amy正式曝光,總算為事件劃上句號,問到Amy當時有否戥男友肉痛? 她說:「槍打出頭鳥,拍劇嗰陣已經建立咗好大嘅默契,唔會話係要收收埋埋,私私縮縮,又或者要誇大嚟講,變咗可以好坦誠去分享自己嘅感受,就算係好同唔好,亦會一齊面對問題。」

雖然得到女友支持,不過Ian坦言事件對他來說,的確是一個考驗:「坦白講都會唔開心,好彩係有朋友陪伴,細個嗰陣,開心同唔開心都好,我都唔會同朋友分享,甚至連屋企人都唔會,經歷咗呢件事,同佢哋建立咗深厚嘅感情,好多嘢講咗出嚟係會好舒服,我都明白呢啲嘢係無可避免,入行前都已經預計過,做得幕前都會有批評,呢啲要自己消化吓。」他還說:「我哋大家之間係好坦白,好多時候會互相講吓自己嘅感受,唔會有嘢係收喺心底而會好難受,同埋我哋有溝通,大家都會舒服咗。」

擔正做主角的《無限》經已播出,外間視為對撼TVB的其中一個「武器」,披甲上陣的Ian並未有因此而感到壓力:「壓力係嚟自自己,心態係想拍啲嘢得到大家嘅認同,可能大家見到我哋3個新人去擔正呢套劇,唔知我哋係得唔得,面對呢啲質疑,我哋想更加拍好啲,尤其呢套劇有咁多前輩加持,唔知可唔可以將自己最好嘅一面畀大家睇,得到大家嘅認同。」他更直言自己未有偶像包袱:「喺台上嘅Ian唔會做嘅嘢,喺套劇入面做晒,我冇理本身係咪歌手,總之一埋位就完全投入角色,希望多啲人可以睇到,喺台上同做戲嘅Ian係唔同。」他還說:「我冇擔心(戀情)會成為焦點,Amy嘅演技OK,一定會留意佢,向好嗰方面諗,只要係大家多咗留意套劇,我都會覺得好開心!」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner