御用奸人徐忠信年少火爆撩成龍打架 做秋官替身斷十字韌帶終身廢武功

更新時間 (HKT): 2021.04.17 00:04

文無第一,武無第二。行內人尊稱為「大師兄」、現年66歲徐忠信,在電視、電影內演出的角色,都離不開大賊、黑社會大佬,就連在李連杰的黃飛鴻系列《鐵雞鬥蜈蚣》中演大官,都是奸官一名,儼如奸角代言人。

演惡人入形入格

早前徐忠信接受《蘋果》訪問,談到他歷年來的奸人角色,他的招牌笑聲,依然震撼。講到「大師兄」外號的由來,他細說從前︰「我喺京班出身,因為都算入門早,係好多人師兄。所以咁多年嚟,人人都咁叫,叫慣咗咪『大師兄、大師兄』咁叫,程小東同火星(蔣榮發),都係我師弟,雖然年紀佢哋較大,不過我輩份高。」

徐忠信十來歲出道,在《飛刀手》中做童星,之後演員、龍虎武師、替身、武指都撈過。講到最入屋,是加入TVB後演的「惡爺」角色,惡形惡相入形入格。獨具慧眼的是導演杜琪峯,他笑說︰「可能我樣衰,不過有時我做嘢又真係幾惡。如果做得唔好,我真係會開聲話。因為係要咁,先控制到演員盡力去做。又唔算係鬧嘅,我都係呼喝啫,會話『你唔得嗎?唔得就我嚟!』你真係唔得,你講就可以,我啲兄弟有工開(替身)仲好。」在杜Sir投身電影圈後,徐忠信都一直有份開工,直到近年杜Sir才沒再找自己,他笑笑口說︰「唔知係咪上次佢搵我,我唔得閒幫手,杜Sir嬲咗我。」他透露疫情後,已有一年沒有開工。

做鄭少秋替身飲恨

徐忠信講到電影武行中最賺錢的,莫過於做替身,他說︰「有工開真係好好,因為計雙工,例如武師係1,500蚊一工嘅話,替身就係3,000蚊。仲要睇吓乜嘢動作,如果真係好危險嘅動作,就要傾價錢。」

辛苦錢搵命博,一次意外令大師兄飲恨,提起往事不無欷歔︰「嗰次幫鄭少秋做替身,拍TVB劇《決戰皇城》,原本拍好都已經OK,導演話不如嚟多個轉身落地,咁就出事!再跳一次,人就落咗榻榻米,隻腳跌咗出去,扭斷咗十字韌帶,廢咗武功,現在可以話係終身殘廢。嗰時都叫有賠,啲醫藥費幾萬蚊都係TVB畀,嗰時唔識,個賠償金應該唔止(咁少)。如果嗰時有賠償,可能而家唔使咁惆悵。」所以自從那一次,徐忠信就沒有再做替身,只靠把口做武指搵食,之後與李連杰合作《黃飛鴻之鐵雞鬥蜈蚣》,戲中演清朝高官「笑面虎」笑裏藏刀,跟李連杰的對打更是代表作,不過大師兄說戲中不少動作,都要安排替身上陣。

挑機成龍講手

自言年少輕狂,年輕時動輒講手,試過在酒吧一言不合就打架,估不到對方是便衣警察,徐忠信說︰「後生唔識死,大大小小都打,打過5、6場交,醉酒開片被斬傷都試過。有次喺尖沙嘴酒吧打個外國人,打咗幾下,佢晒個證件出嚟,至知佢係督察。無嘅,嗰時冇而家咁嚴厲,咪講句sorry『耍冧』囉。」

講到最激可算是與成龍在車廂內講手,當時他們為邵氏的《鏢旗飛揚》任龍虎武師,車駛往洪水橋。徐忠信坐在成龍後面,一上車他就將腳𢲲在前座的椅背,成龍自然撥開。徐忠信一句「撥乜X嘢」,跟手就向對方開拖,最後要一班師兄弟拉開︰「講真我係唔夠佢(成龍)打,兩嘢就俾佢撳咗落地下,我係夠狼咋,講打唔夠佢嚟。其實好小事,係我唔啱,冇理由放對腳上去。佢彈起咗之後,都冇撈過佢嘢(工作)。」而不少師兄弟都獲關照開工。

火爆性格又豈止一單?更經典的是當時得令的大美人林青霞亦被玩。故事從徐忠信當年出差到台灣做武指說起,主角是鄭少秋、林青霞,徐忠信做武指兼任演員,其中有場戲講秋官要去化骨池英雄救美,有位老兵出身的場務,開拍前將乾冰放入化骨池,製造煙霧效果,老兵將乾冰放入池時有水花起,彈中林青霞,她略帶晦氣向老兵說了句「你幹嘛?」徐忠信看不過眼,覺得青霞欺負老人家。到正式拍攝時,徐忠信報復式NG,青霞終於忍不住出聲。徐忠信接着就借題發揮,爆出一連串粗口,令現場氣氛繃緊。回想當年年少氣盛凡事強出頭,他亦無奈搖搖頭,苦笑話︰「後生脾氣唔好,希望都借呢個機會同得罪過嘅人,認真咁講句對唔住。」

徐忠信御用奸人外號並非浪得虛名,但講到孫仔灝霖同孫女穎蕎,就不自覺一臉慈愛,溢於言表。他展示一對孫的照片,孫仔更盡得真傳做出一字馬︰「我冇訓練佢哋,只係大約教佢哋點做,跟住就自己學。不過佢哋真係好聰明,跳舞都好犀利。我教佢哋要畀心機讀書同聽爹哋媽咪話,因為供書教學好辛苦。」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner