狗仔出更丨鄭嘉穎帶仔遊維園睇放船 百厭Rafael險跌落水幸陳凱琳捉實衫尾

更新時間 (HKT): 2021.04.18 00:30

鄭嘉穎與陳凱琳(Grace)結婚三年育有兩名兒子,分別是兩歲大仔Rafael、八個月大細仔Yannick,由於工作受到疫情影響,嘉穎近年大部份時間都留港陪伴妻兒。日前接近黃昏時分,嘉穎與Grace帶同大仔Rafael到維園耍樂,同行還有Grace的一位女性朋友及一對父子朋友,四大兩小在模型船池區,Grace跟朋友在聊天,嘉穎父子則在池邊睇人玩遙控船。

現場所見,Rafael不停跳跳紮,非常活潑,手裏拿着一支小棒經常想伸手去撥水,嘉穎一不留神,Rafael就已經爬上石壆。由於池中的遙控船開得快,加上再踏一步Rafael就會跌落水,實在有點危險,故嘉穎見狀後即抱起Rafael,交給正坐在長凳上與朋友聊天的Grace照顧,而嘉穎則在池邊跟船友聊天。

當Grace抱住Rafael時,百厭的他一直周身郁冇時停,於是Grace再同囝囝到池邊玩水,Grace非常小心地捉實正趴在石壆潑水的囝囝衫尾,以防他動作太大跌落水,其間同行的小男孩忽然跳上石壆,搞到Grace一邊要出手箍實小男孩,另一邊則要捉實Rafael,有點忙亂。之後到嘉穎陪囝囝玩時,雖然他已拖實站在石壆上的Rafael,但百厭的Rafael卻因為想玩水,伸手向前時差點在石壆上失平衡跌倒,幸Grace眼明手快即時拉實Rafael並把他抱回地面。

玩到接近傍晚,Grace和女性朋友擁抱道別後,就拿出手機為嘉穎同Rafael跟同行的父子影合照。夫婦二人跟朋友道別後,嘉穎推着BB單車離開維園,再往炮台山方向行去,其間Grace入了兩間舖頭買東西,而嘉穎則推着單車繼續行。過馬路時,推着Rafael的嘉穎就貪方便,沒有跟着紅綠燈下的過路線行,反而以斜線橫過馬路,而買完東西的Grace亦跑住「打斜」過馬路追老公,然後一同返回寓所。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner