何婉盈回顧情路一直重複犯錯 成世人最佳抉擇係未婚產女

更新時間 (HKT): 2021.04.18 17:39
(IG圖片)

49歲何婉盈(Elaine)當年與郭靄明、蔡少芬同屆參選港姐,殺入5強獲TVB力捧,之後簽約華納唱片,即奪下叱吒樂壇新力軍女歌手銀獎,歌曲《再見亦是朋友》、《愛上你是我一生的錯》曾成為大熱K歌,但最後也只是「一碟歌手」,發展未盡如人意,1996年選擇退出娛樂圈重返校園,最近又再回歸娛樂圈,日前她接受商台《1圈圈 星光背後》訪問,回顧過去成長歷程,坦言在感情路上一直重複犯錯,唯一做得最正確是生下女兒。

何婉盈坦承出道時飽受抨擊,慶幸得到劉德華鼓勵,「人大咗,先學識唱歌要放鬆,當年雞仔聲,亦都因為太多工作,歌未練好就入錄音室。好記得拎新人獎表演唔太理想被噓,華仔喺後台走過來拍拍我膊頭同我講『人生有高有低係必經過程,冇問題,你加油。』當時我好感動,呢件事我都係第一次講,唔知華仔仲記唔記得,但我記到今日。」

推出專輯後,她對唱歌失去信心轉為拍劇,過了3年多便決定放棄,她直言因事業無突破及收入太低,「最初都鍾意拍劇,但之後3年幾都係日接夜、夜接日,又捱夜又病,就會諗自己人生係咪一直咁落去?加上睇住銀行戶口掹掹緊,每個月得5、6千,嗰時覺得喺娛樂圈5、6年都夠回憶,咁啱港大又收我,決定再讀書還爸爸心願。」

曾公開與魏俊傑拍拖

何婉盈直認感情上也很任性,1993年事業上位期公開與魏俊傑戀情,問到這段3年情有否拖累事業,她表示:「當時無諗咁深入,或者對歌手形像有影響,可能當時唔公開會好啲,但公開咗都無辦法,唔可以話後悔,都係人生一個過程。」2001年,她與圈外商人傅大全結婚,但不足兩年便離婚收場;2007年重遇中學同學,拍拖期間意外懷孕,最終她選擇當一個單親媽媽,囡囡現年14歲。

她坦言自己感情一直重複犯錯,「當年29歲加上爸爸病重,覺得女人係時候要結婚,無諗過對方生活習慣同人生價值觀完全唔適合自己,到35歲又覺得做女人係時候要生BB,我成日同阿女講,我人生不斷重複犯錯,成世人做得最啱就係生咗佢,因為我而家好開心,同囡囡好似朋友。」何婉盈指與女兒父親同居兩年多,最終因性格不合分手,但能保持朋友關係,沒對女兒成長帶來影響。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner