林家謙ViuTV攞獎被指黑面態度好寸 網民斥上TVB笑到四萬咁口

更新時間 (HKT): 2021.04.19 23:26

新增回應

有人說在職場上態度決定一個人的高度,咁究竟「高度」係講緊「有嗰句講嗰句」嘅193高,定係「前輩唔得罪得」嘅曾志偉地位高!?有時確實好難拿捏,原因係每人對道德及禮貌,心中嗰把尺都唔同,而今次被量度嘅對象就係性格低調內斂嘅唱作歌手林家謙!

ViuTV首屆樂壇頒獎禮《Chill Club推介榜年度推介》昨晚圓滿結束,有人讚ViuTV冇偏心「親生仔」MIRROR攞晒獎,反而唱作人林家謙力壓MIRROR奪得6個獎成為大贏家,包括兩個大獎男金及年度歌《一人之境》。這種公平現象再次讓年輕網民嘗試愛上香港樂壇。

網民斥上TVB笑到四萬

噚晚林家謙首次上台領獎沒頒獎嘉賓,就講咗一句「個獎自己拎㗎,咁隨便嘅。」之後又有人影到林家謙用手指捽一捽個獎座,第4次上台嗰陣,林家謙已木無表情,直接表明冇乜嘢講;事後林家謙接受訪問,大嘆好緊張、有壓力,非常不習慣「老是常出現」,換來不少網民狙擊,對他發言及表現評價好壞參半,把林家謙推到風口浪尖,狠批林家謙性格「囂張」。

有網民稱林家謙喺台上黑口黑面並唔尊重大會,講得獎感言又寸嘴、一臉嫌棄,好似被迫做幕前咁,又指佢未紅先驕,更摷出林家謙早前喺TVB勁歌頒獎禮嘅影片,批評佢在大台拎獎笑到四萬咁口,反而在Chill Club成為大贏家卻禮貌欠奉,認為林家謙台風木獨、唔識對住鏡頭講嘢嘅表現,作為歌手理應去改善。

被指寸嘴唔尊重場合

網民一整晚在熱鬧討論,以林家謙嘅「言行」係咪適合專注做幕後比較舒服自然,不少網民紛紛留言「林家謙改壞名都唔X謙」、「唔理你想唔想做幕前,真唔真性情,你有冇考慮過觀眾,或者投你隻歌嘅人」、「睇到就勁肉酸、勁尷尬,你話佢內向,我就未見過內向嘅人咁X寸囉!最外向嘅陳奕迅都唔會咁啦」、「而家係X攞獎態度差、冇禮貌唔識尊重個場」、「唔係X佢唔夠料拎獎喎,係講緊佢拎獎嗰時嘅態度」、「而家就係話支持佢嘅人搞到佢好大壓力」等。

更有網民摷出林家謙一段受訪舊片,當時問佢想做幕前定幕後,林家謙回答做「幕前」,該網民質問謙粉:「出嚟講兩句啦!你哋個不問世事嘅『清泉偶像』選擇幕前喎,咩唔想做幕前呀,佢係咪被迫呀?」

謙迷為偶像抱不平

謙迷努力在網上護航,認為林家謙不應該隨波逐流去討好觀眾,有「謙迷」指他做開幕後,拎獎係做番自己本性,顯露內斂嘅一面,「睇過佢啲訪問都知佢唔係幾識包裝自己,有時講嘢真係有啲寸。」

亦有網民稱:「佢喺CCTVB嗰個奬係『唱作』歌手奬,ViuTV嗰個係『整體』嘅男歌手奬,佢係有自知之明先覺得拎『整體』奬有啲唔好意思,你哋覺唔覺得佢嘅反應其實唔係寸,係不知所措,如果寸,唔重視個奬,使乜講咁X多感受。」另有「謙迷」批評網民根本雙重標準,指以前許多歌手都唔太識講嘢,王菲在台上開演唱會只講多謝,「冇同過觀眾social 」!歌手Serrini也幫口在facebook留言:「愛護家Him,你我有責。」附上一個雙手合十的emoji。

林家謙今早仍被網民狙擊未為「失態致歉」,當網民見林家謙在IG轉貼與張敬軒的對話,即留言「好似自己好委屈咁,無論動機係咩畀人覺得感覺唔好,係咪要道歉呀!連向Viu道歉都冇,真心失望」,由於網民言論過激,令不少謙迷心痛偶像,有感「樂壇已死」係因「批鬥」累事,「年年邊個拎獎都畀人X」。

事件發酵近一日,林家謙終於蒲頭,他在IG貼文多謝ViuTV:「感謝@viutv #ChillClub年度推介頒獎禮給予肯定和難忘的表演機會,也多謝每一位投票的樂迷,很感恩得到大家對我音樂的厚愛。由頒獎那一刻到現在,我還在努力消化當中,亦知道除了在音樂上,在表達自己方面亦有很大的學習和進步空間。衷心感謝每一位支持和信任我的朋友與歌迷。」但他未有正面回應自己被指寸嘴的指摘。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner