YOLO的練習曲丨Jeannie怕花姐唔敢攞Ian電話 曾因壓力暴肥至132磅

更新時間 (HKT): 2021.04.19 00:30

互聯網發達,越來越多靚女成功瞬間爆紅,ViuTV早前播出的偽真人騷《YOLO的練習曲》便找來20位深受網民愛戴的高顏值人氣女神演出。日前《蘋果》找來曾演出《試當真》Channel短片《唔通佢有男朋友》而爆紅、被網民封為「港版周子瑜」的吳家忻(Jeannie);以及另一位「試當真」演員,憑住一對精靈大眼和甜美笑容,獲讚是「理想女友型」的陳苡臻(Jessica)一齊接受訪問。二人即場跳唱劇集主題曲《選擇困難》,雖然舞步不齊兼甩拍子,但喜感十足,對網民批評MV表演未達標,Jessica說:「係有進步空間,但3日練習時間嚟講,算係滿意交到貨啦!」

吳家忻今年22歲,是香港城市大學主修媒體與傳播系的Year 4學生,從小喜歡演戲,外表斯斯文文,但表情多多,「細個好鍾意沖涼時發神經,扮鬼扮馬演宮廷劇,扮劉三好(《宮心計》中佘詩曼角色)做主角,扮畀人迫害,吖(高八度)。」家忻自得其樂,但卻因家人反對而放棄報考演藝學院,在機緣巧合下,去年中獲邀拍攝第一個廣告,不足1年已成為廣告小天后,接拍牙刷、洗頭水、銀行、地產、傢俬連鎖店等大大小小接近10個廣告,她數數手指說:「數唔到……又唔係話多到數唔到,我諗十隻手指數得晒嘅。我諗佢哋想見一啲新臉孔,同埋我做嘢表演OK,加加埋埋賺7位數?梗係冇啦,我都抵(請)㗎,哈哈。」

五官標緻夠上鏡,家忻經常被指似「邊個邊個」,周子瑜之外,還有黃伊汶、周嘉玲等,但她最希望似韓團BLACKPINK的Jennie,「似邊個都開心,但更希望大家睇到我嘅另一面同作品多啲。」家忻不介意被指鼻子生得大,也不介意做醜怪表情,自覺不是靚女,「我五官分開睇唔係特別精緻,但合埋一齊都OK!我個鼻都真係幾大㗎,但照鏡又覺得OK,都match到我個樣。」她更自爆考大學時因壓力爆煲,體重直線上升,「我細個都係肥妹,幾年前考試壓力大,勁鍾意食嘢,加上冇時間做運動,塊面脹到冇輪廓,我唔高都有60kg(約132磅)。後來試斷食,又用唔同方法減肥,好彩半年後瘦得返,而家回落至103磅左右,雖然唔係好瘦,但都夠。」家忻曾在香港Rapper「Tyson Yoshi」的MV《Something》中有低胸性感演出,她笑說:「我會稱之為小性感,唔係性感,喺我世界係fashion嚟。我亦唔想太曝露,怕屋企人擔心。」

早前家忻為陳卓賢(Ian)的新歌《DWBF》擔任MV女主角,問到有沒有被「電親」,她搞笑地說:「冇冇冇,哈哈,梗係有啦,佢咁靚仔。但我同任何男仔做嘢都保持距離,一來專業,二來人哋有女朋友都要避忌,我都分得開。」有沒有交換電話?她決絕說:「冇,花姐唔畀!」真實的感情狀況,她賣關子說:「都係咁啦,喺街見到我拖住嗰個就係嗰個。唔係怕fans妒忌,只係想將感情事低調啲。」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner