林雪呻被餵食爛提子笑表面「疏肝」 難捨有骨氣寶馬

更新時間 (HKT): 2021.04.19 21:00

由周顯揚執導、古天樂、劉嘉玲、林雪等人主演,改篇自遊戲電影《真·三國無雙》快將在港上畫。林雪演性情殘暴、荒淫好色的董卓,日前跟導演接受訪問,提到董卓在片中「享盡美色」,林雪稱有苦自己知,此片更成為他從影以來,最辛苦的一次!

董卓有眾多妃子,林雪笑言美女們都穿上薄紗拍攝,算是導演的獎勵,但並非自己要求:「唔係我要求,董卓N年前嘅要求,我只係執人口水尾。」畫面上林雪享盡艷福,不過暗地裏被整蠱,他說:「妃子有天真、可愛靚女,佢哋又(披)薄紗一塊,餵吓提子。好嗰啲提子佢哋未埋位時已食晒,到(拍攝時)餵就畀爛嘅你食,我OK,知道爛。咁我係董卓,梗係畀妃子食!你畀粒爛我食,我餵返你,久而久之就唔畀爛嘅我食。」

導演周顯揚大讚林雪演活董卓一角,林雪也十分欣賞董卓:「因為細個家庭貧困就冇乜接觸,我冇乜讀書,限制咗想像力,之後慢慢我就靠自己奮鬥努力靠自己想像,有少少錢就補償想像力,對佢更深刻。最初只係喺門口睇人打機(街機),之後上網睇,鍾意呢個角色。」問到林雪是否能使出絕招「無雙」,他笑言:「未練成,導演未畀我,如果佢畀把刀我就OK喇,耍大刀!」

全民變「古天樂」

片中所有實境於新西蘭拍攝,演員們因為飾演武將,全部要穿上厚厚的盔甲,在當地炎熱氣溫下開工,苦不堪言,林雪就算眼睛可吃冰淇淋都不能降溫:「着到套衫似漢(汗)人,因為好多汗,出好多汗,人哋出汗我就漏水。嗰陣時我好fit,氣色又好,日日曬太陽,拍嗰部戲,企喺古天樂側邊,個個都係古天樂咁嘅色,皮膚咁樣就好,出汗有新陳代謝,對我係好嘅,我拍呢部戲有着數,做董卓,又有女兒香,我又可以減肥身體好。人思考要向好多面諗,開另一扇窗先得。」周顯揚指差不多每場群戲也會有人中暑,後來在劇組演員盔甲上穿了小孔讓大家散熱,不用拍攝時就會在現場灑水降溫。

演員熱到中暑,就算連戲中的馬也逃不過厄運,有隻馬拍攝中途死掉,林雪澄清不是自己騎死對方:「唔係騎死,佢中暑,佢覺得日日畀你騎我情願死,幾有骨氣!幾百磅你日日騎我,我死畀你睇。佢就走咗,我唔捨得,不辭而別,咁樣唔得。嗰隻係寶馬,送畀呂布(古天樂飾演)。」

導演從小着迷

今次周顯揚選了《三國演義》中黃巾之亂至三英戰呂布的故事作題材,這是他自小最喜歡的段落:「通常啲人講《三國》都離不開講赤壁嗰啲,但我由細都鍾意董卓嗰段,我覺得嗰個時候,佢哋班後生仔打出頭,唔理佢哋目的,可能各有說法,但呢班後生都離不開打天下,我就覺得劉備都有野心,劉備係第一個稱帝,佢喺蜀國稱帝,曹操到死都未稱帝。」

眾多好戲之人齊集這戲,導演也自言拍攝時看到也感過癮,看到演員間擦出的火花。而他承認大家戲份都差不多,但最注重還是拍攝出來的故事為重:「人物好多,聚集咁多好演員放入戲,個個似主角,搞掂檔期放喺同一戲已困難,睇佢哋演已好過癮,分佢哋嘅鏡頭,盡量平衡。其實每人篇幅好多,分配要喺劇本諗,最終都唔係戲份問題,主要出嚟古仔好睇。」導演表示Netflix已買了播映權,而這戲亦得遊戲製作人的讚賞。

場地提供:Cubus 28 x 月下酌

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner