掛部林寶堅尼上牆當藝術品《10星級的家》繼續帶你去美國睇「堅離地」豪宅︱果燃上架

果燃娛樂︱10星級的家

更新時間 (HKT): 2021.04.19 00:00

細個睇完《奪寶奇兵》,會同阿哥喺碌架床捐窿捐罅玩冒險,睇完《星戰》又會去屋企後面個地盤,扮去咗沙漠,拿兩碌捲埋嘅報紙扮決鬥,喺香港呢個狹小嘅空間,呢啲已經係我最大嘅想像。人大咗間屋細咗,見到古天樂間2,000幾呎嘅「星戰私人秘密基地」我會「嘩」一聲,喺街見到部林寶堅尼,我又會「嘩」一聲,呢個「嘩」係代表羨慕。睇完呢幾集《10星級的家》我都「嘩」咗一聲,但呢個「嘩」嘅體積大好多,都係嗰句size does matter,呢個「嘩」係代表「使唔使咁誇張先」。

果燃推介嘅《10星級的家》帶你飛去地球嘅另一邊,地大物博嘅美國,睇睇美國人點樣天馬行空咁將夢想融入家中。品味嘅嘢見仁見智,但「離地」程度就確實係堅。

果燃娛樂丨10星級的家 第5集 一按到果燃台足本收睇

距離洛杉磯2小時車程嘅棕櫚泉,是一座沙漠中嘅城市,氣候長年溫暖乾燥,係美國加州著名嘅度假勝地。喺山脈之間,有間望落似科幻電影入面啲基地咁嘅屋,極具未來感。

「未來派科幻風水屋」加州棕櫚泉

間屋唔係好大,5,000幾呎咁啦。屋入面用咗好多螺旋形設計,線條環環相扣,有地、有水、有火、有風,老外設計師稱之為能量漩渦,華夏文化簡單啲,叫做風水。無邊際泳池望出去係沙漠,有啲去咗火星咁嘅feel。

「奪寶奇兵男人樂園」加州佛斯奴

如果你成日睇美劇,可能都會聽過「Man Cave」呢個詞彙,指嘅係男人喺屋企嘅專屬空間。佢可以喺呢個空間裏面享受自由,可以安靜獨處,亦可以邀三五知己來飲飲啤酒、打打遊戲,簡言之,就係男人充電嘅地方。

但係加州佛斯奴呢個「Man Cave」有成7,200呎,會唔會誇張咗啲呢?設計師同屋主都係《奪寶奇兵》迷, 一係唔搞,一搞就直頭搞咗個主題樂園出來。

果燃娛樂丨10星級的家 第6集 一按到果燃台足本收睇

香港有錢人都唔少,耐唔耐就會喺街見到林寶堅尼呢類名車,但我冇諗過有人會掛部林寶堅尼上埲牆度做裝飾。

「堅離地林寶堅尼」加州新港灘市

位於加州新港灘市嘅呢間屋,啊,係莊園先啱。除咗居住面積有5,000呎嘅主屋加個面積3,000呎嘅車房之外,仲有個1,200英畝嘅葡萄園同一個完整嘅酒莊。牆上掛嗰部林寶堅尼係1974年嘅Countach S,屋主話部車長期放咗喺海灘,油缸嚴重生鏽,醫返都嘥藥費,所以索性將佢掛上牆當藝術品。

「百年歷史鐘樓屋」三藩市

我哋都身處時間嘅洪流之中,跟住歷史跑,但有冇諗過住喺一個鐘入面係咩感覺嘅呢?呢個鐘仲要有過百年歷史。

位於三藩市嘅呢間鐘樓住宅,具有百年歷史價值,而且獨一無二只此一家。鐘樓4層高,每層都有12至13呎高樓底,連接各層嘅鋼鐵樓梯係呢座建築物原有建設,甚具歷史價值。

4個樓層都可享有360度環迴景觀,可以望到南灣區全景同新海灣大橋。最頂層係大鐘室,你可以喺度靜靜坐低,播住《A Whiter Shade of Pale》,望住時間流逝。

果燃娛樂丨10星級的家 第7集 一按到果燃台足本收睇

新港灘市係南加州主要流行商品購物中心,有一流嘅海岸景致,係豪宅嘅集中地,除了上面介紹過嘅「掛牆林寶堅尼」屋之外,仲有呢間。

「法南風穴居城堡」加州新港灘市

樓高3層,大約1.8萬呎,走法國南部鄉間別墅風格嘅石屋,石牆同天花板建材來自法國布根地,帶出一種城堡嘅效果。屋主係一名汽車收藏家,為咗擺放佢嘅收藏品-十幾部經典古董車,佢仲特登整咗個大約3,600呎嘅洞穴車房。

「室內私人水族館」新澤西州拉姆森市

潛水你可能試過,喺自己屋企潛水你有冇諗過?唔係喺浴缸度玩閉氣喎。

有人養狗,有人養貓,屋主獨愛養魚,唔係金魚錦鯉呢啲一般嘢,係佢喺新澤西海岸捕獲嘅本地魚,普通魚缸唔夠大,於是佢喺自己1.6萬呎嘅屋企,起咗間幾百呎嘅巨型水族箱。

《10星級的家》同你出走香港,睇吓美國人裝修有幾癲,第1-7集節目現已上架,即上果燃台收睇足本節目

果燃台 | 果迷專屬嘅影片世界

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner