蔡裕彤從《警訊》演員到電影新人 29歲演中學生如歷二次人生

更新時間 (HKT): 2021.04.20 00:30

經常在港台《警訊》短劇中飾演受害者角色、人稱「警訊老闆娘」的蔡裕彤(Toby),沒想到有一天會從電視跳進電影大銀幕。今年29歲已婚並育有2歲女兒的她,在處女作電影《二次人生》中飾演肥妹中學生天心,這個反差連她自己也不敢相信。事實上,她穿上中學校服、束起頭髮、沒施脂粉,竟又恰到好處。

試鏡以為被玩

從監製柯星沛口中得知,原來為了找肥妹這個角色人選,劇組花了不少工夫,因為肥妹難找,識做戲的肥妹更難找。Toby早前在佐敦接受《蘋果》訪問,提及監製所說,她坦言當日試鏡時,還以為是被整蠱,「收到電話叫我上去試鏡,點知係試件校服,初時都驚㗎,係咪玩我呢?會唔會唔似學生呢?後來着上身試完,佢哋話OK!」

Toby從小到大都喜歡演戲,曾在中學時當戲劇社會長,原本想報讀演藝學院,可是成績未能達標,沒想到機會總會有,「有朋友拍開港台,就咁介紹我入咗去,只要肯出鏡講幾句嘢,咁樣一做就做咗幾年,而家我仲有約。」2014年她加入港台主力拍攝《警訊》中的短劇,其間亦有拍教育電視的節目,連她發夢都估不到,竟然有一天踏足電影圈。

快將踏入29+1之年,Toby既是已婚婦人,又是媽咪級,沒料到處女作演學生妹,外形過關,Toby坦言要過心理關口,「做學生妹喎!驚說服唔到,導演搵我時,我剛剛生完BB幾個月,由中女變媽媽,又叫我變返10幾年前少女咁,拍之前我要上網睇返啲後生女KOL,而家係點講嘢,聲線係點,始終我同10幾歲係有一段距離。」Toby更深深體會,她今次經歷如戲名一樣是她的「二次人生」,「算係呀!好似畀咗我第二次人生咁,疫情呢段時間咁啱港台《警訊》完咗,又未有新工作安排,仲以為冇幕前工作,點知劇組就搵我。」

肥妹人生

上磅接近190磅的Toby,肥胖原來是家族遺傳,只有媽媽是瘦人。由細到大都是肥妹仔一名,自言少女時代貪靚的她,曾以偏激減肥法,令自己激瘦,「中學時好想瘦,用啲偏激減肥方法,又食減肥藥,當時係好瘦,最瘦時得110磅,瘦到見鎖骨,腰又有。後來一反彈,每年增長以數十磅計,又變返肥妹,該有嘅都冇,而家反彈返多咗一個我,哈哈!」談起最瘦的日子,Toby仍陶醉當中,她說︰「最瘦時我做過平面model,減肥成功之後信心直頭爆燈,有人追、有人鍾意,我老公唔係點識返嚟?唔係邊會有人肯落沓?不過開心唔夠一年。」她笑指隨着和老公的相處,發覺大家共同興趣是食,所以身形同樣隨年月一齊增長,「所以佢冇嫌棄我,佢都接受到自己,冇理由接受唔到我。」

難得Toby是位樂觀的肥妹,與戲中的天心,有着樂觀的態度。不過她曾因為減肥過度,令自己情緒不穩,「嗰時用極端嘅方法減肥,去藥房配藥,又要減糖又要去水,仲要戒澱粉質,搞到肚屙,仲一星期跌兩部電話,情緒好暴躁,後來覺得好辛苦,好大壓力,反而食嘢令自己開心、放鬆。」Toby完全是化悲憤為「食」量,「最誇張就係飲甜嘢,我一晚可以飲6包檸檬茶、汽水4、5罐,一餐飯仲可以飲3罐,糖份吸收得太多,但食甜嘢會好開心,忍唔住口。」

身體響警號

不過約3、4年前,Toby的身體因肥胖而出現問題,「我試過高血壓入咗醫院,睇嘢有重影,血壓高到爆,醫生話我:『你咁肥,要拮手指。』好彩未有糖尿,不過我大肚時曾有過妊娠糖尿,但我覺得做肥人開心過瘦嘅時候。」但Toby不諱言,曾被人取笑她肥,「中學時成日都會俾人笑,尤其上PE堂,話我『扽吓、扽吓』,好彩我比較惡,話返人哋排骨精囉。」

初時開始回復肥妹的身形,Toby坦言曾有不開心,「嗰時仲做緊model,後來肥返10磅,有間公司casting,人哋攞住把尺嚟度,寸我腰多咗3吋,佢唔係直接話你肥,而係用咁嘅方式,真係好失落好唔開心。」自從沒有做model的機會,她就學化妝做化妝師,近年又在社交網發表育兒帖文,學做媽媽界KOL。「自卑感梗會有,好似生活上最唔開心坐交通工具,個人大嚿啲,pat pat又大啲,買床都要super king size,最唔方便係去商場廁所,間格太細會被撠住。」在《二》片中阮兆祥、盧覓雪飾演她的父母,意外地看上去3人如一家人,「係呀,劇組都話我哋好似樣,尤其笑嘅時候,好搞笑。」Toby坦言如果肥人能帶給別人歡樂及正能量,何樂而不為,繼續當「肥妹」!

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner