廖啟智安息禮丨鮑起靜哽咽送別智叔 方中信深呼吸強忍悲傷

更新時間 (HKT): 2021.04.20 17:08

在智叔的安息禮完結後,到場弔唁的嘉賓陸續離場,其中智叔的「跑友」方中信、米雪及鮑起靜一同受訪。他們仍未平復悲傷心情,鮑姐哽咽着透露,安息禮的氣氛安詳又溫暖,並指智叔在大家的祝福下離開;而平日在鏡頭前man爆的方中信,則眼濕濕地受訪,明顯捨不得智叔離開。

方中信提到與智叔的「跑友」交情,強忍悲傷地說:「咁多年嚟,我記得我同智叔拍完《無雙》之後,我哋同發哥一齊跑步,一齊跑跑咗4年,一路都好開心,但係喺最開心嘅時候離開咗我哋,係有啲唔捨得。」方中信受訪時需數度深呼吸控制情緒,他坦言:「我記得最後嗰次係11月尾,之後因為唔想騷擾智叔,所以冇去醫院,始終呢個病都唔係好易去醫嘅。」米雪大讚智叔的跑姿靚:「智叔嘅跑姿好靚,幾時都係咁靚!因為我初初加入去跑嗰陣時,智叔係好take care我哋。」

方中信指,智叔近年一起跑步,人變得開朗得多,亦見證着智叔變得越來越開心,所以已經沒有遺憾。鮑姐補充指:「我相信我哋以後跑步佢都會喺度,因為每次跑親步,我哋呢啲好渣嘅人,佢係A組(跑得較好)嘅人,佢係不斷來來回回嚟睇住我哋C組啲人,咁我相信佢一定係會……」

讚智叔演出水準穩定

問到過往的合作經驗中,最欣賞智叔哪一方面?鮑姐表示:「我好欣賞佢對每個工作都揸到好實,永遠都唔會放棄,我睇佢每一部電影都係咁好。我同佢一齊演過舞台劇,每一場佢都係咁穩定嘅。」她指自己當年是舞台劇新丁,但看着智叔的演出,也不禁大讚犀利,鮑姐續指:「佢真係好敬業同好專業,同埋佢好關心我哋嘅電影圈、我哋嘅發展、我哋嘅朋友,每一個人,乜嘢演員嘅演技,每一部戲,我哋有時大家一齊傾吓,邊個好呀,邊部戲點呀點呀,佢真係太熱愛電影呢個工作,我相信佢去到上面都係一樣。」

智叔遺願必達成

講到智叔有個遺願,想完成一部電影,鮑姐稱:「已經有人幫,一定會開拍到!」對於智叔的遺孀陳敏兒,米雪表示不太擔心對方:「敏兒姐好堅強,佢頭先喺入面(安息禮)一路帶領住我哋,喺一個好開心、好安詳嘅氣氛之下,送走智叔。」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner