廖啟智安息禮|陳敏兒送別亡夫表現冷靜:好好休息,我以你為榮

更新時間 (HKT): 2021.04.20 16:45

廖啟智安息禮於今日下午2時半假尖沙嘴聖安德烈堂舉行,禮堂外擺放各界親友所送花牌,禮堂內安放了智叔的白色靈柩,而太太陳敏兒所送的白色心型花牌放在正中間,兩旁則擺放了兒子文哲、文信的花牌。遺照用了一張智叔身穿牛仔褸,合上雙手側身望看鏡頭微笑的相片,禮堂佈置簡潔。禮堂門外放了一幅智叔站在萬里長城的照片,陳敏兒說:「係智叔自己揀嘅遺照,所以還佢心願揀左放門口,但因無人用戴太陽眼鏡相片做遺照,我就再揀咗張靚仔做遺照。」

安息禮先由牧師帶領眾人祈禱,然後由樂手彈奏序曲,並由文哲與文信吹口琴,驪歌由張崇德、劉美娟、 鄺文珣、王祖藍、杜燕歌和蔣志光等人組成詩歌班獻唱。

短片表揚對演藝貢獻

禮堂上播放智叔生前的演出片段,並由太太敏兒分享丈夫的點滴,另外於舞台劇《野豬》曾跟智叔合作的林嘉欣也預錄片段,她指當時自己要演一個好痛苦的角色,她感激智叔將自己的經歷分享給她聽,即時令她感動到喊,同時亦對角色再明白多一點,她大讚智叔是一位心地廣闊的人。另外,《點五步》導演陳志發也感激智叔對他電影的付出,而一班在浸會大學的學生也感激智叔的教導,有女同學更忍不住哭出來。

在短片的結尾,敏兒以簡單數句,總結了丈夫的一生。「作為一個演員,佢盡力滿足要求,作為一個爸爸,供書教學,陪伴孩子成長,佢曾經講過:『我好擔心你,我好唔放心你』,因為覺得未能完成丈夫責任,作為病人,佢係醫生口中A+病人。我作為妻子,『廖啟智,我以你為榮』」

遺憾未能完成「中國夢」

在今日的安息禮中,陳敏兒和2名兒子均表現堅強和冷靜,他們一齊上台分享昔日和智叔的相處點滴。敏兒說:「智叔道別時,我同佢講一句說話『辛苦你喇,可以好好休息喇。』感激佢,由於佢嘅辛勞,成就我哋好多嘢,佢係咁做係咁做,其實呢一年香港嘅疫情,令我哋更加親密,佢冇工開,我哋又冇乜活動,大家困住喺屋企,我哋亦傾咗好多嘢,佢約定我,開到關之後返國內睇名山大川,我哋又拎地圖,排晒序,第一個去邊個地方、第二個去邊個地方,諗住一通關就一齊去旅行,結果呢個中國夢我哋冇辦法完成,佢真係辛苦命囉,冇乜時間休息。」

離別一日已哭成淚人

敏兒亦有憶述和分享當年和智叔一齊揹着背包窮遊歐洲的往事,她說:「我記得喺1984年,我哋竟然請咗兩個月假,我哋喺TVB做咗幾年儲咗啲錢,嗰時係80年代,好興揹住背囊去旅行,我哋夢想係去歐洲流浪,去住Hostel呀,甚至有一晚喺巴黎我哋試過瞓街,又去到唔同城市嘅大學飯堂去食嘢,點解呀?因為我哋要好慳呀,好慳先可以完成我哋呢兩個月嘅旅行,點知當時我哋計錯數,由於我哋要慳嘅原故,我哋買嘅機票都係好平嘅,唔係直航,不過原來有時差呀,原本我哋告假到10號返香港,點知原來係11號先返到,本來想打去TVB告假,不過TVB講話唔得,10號廖啟智有通告要去拍外景,不能延長多一日,咁當時嗱嗱聲買單程票,但要慳嘛,我繼續坐20幾個鐘,廖啟智同我嗰日一齊去到機場,入閘前,佢擰返轉頭望向我係咁流眼淚,佢喊我又喊,兩個人好似淚人咁,我真係好慶幸當時冇人問我係咪要去移民,冇人問我係咪3年後先見,如果我答『唔係』,話我哋隔一日就見嘅話,肯定有人鬧我哋。」

承諾延續廖家良好質素

敏兒坦言和大家分享這件往事,是想提醒自己,生離死別,那怕會重聚依然是不捨得,敏兒說:「佢喺病房,係咁流眼淚,面對生離死別,佢好唔捨得,正正係佢放唔低啲仔,放唔低個老婆,佢同我講,係打算殿後,佢講『敏兒,我冇諗過要丟低你,而家要留低你,辛苦你喇!』佢就係一個咁有責任感嘅人,佢唔係害怕死亡,佢只係唔捨得我哋,但我哋3個好想畀佢知道,我哋好掂,好會保護自己,而家睇返條短片,亦都深深被感動,我哋睇到佢嘅質素,希望廖家繼續保留佢呢份質素,做個富有責任感同尊重人,你哋(望向兒子)做唔做得到呀?」

感謝好友送人生金像獎

另一方面,敏兒在安息禮上感謝幫忙籌備喪禮的製作團隊、獻唱的詩班及伴奏的司琴人員,她表示感激,她讚會場佈置得好靚,整個安息禮好美麗又平安,她說:「我相信智叔一定會收貨!」陳敏兒又指,在智叔死後,收到很多不同地域、宗教及政見的人士送上慰問,她坦言沒有想過有這麼多人出席,她說:「好感謝你哋送咗最後一個禮物畀廖啟智,聯手打造送畀佢嘅人生金像獎,我而家代智叔領獎。再一次多謝大家對智叔嘅愛,多謝你哋!」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner