陸浩明「豁達」面對被193寸 馮盈盈狂賣口乖為拍檔護航

更新時間 (HKT): 2021.04.20 19:08

ViuTV真人騷節目《全民造星》出身的組合ERROR成員郭嘉駿(193),早前寸陸浩明「40幾歲仲話後生仔傾偈嗰個」,馮盈盈(FYY)及陸浩明(6號)今日在旺角出席活動時回應事件,FYY明顯為維護拍檔,大笠對方高帽,6號似乎十分豁達。另一方面,兩人異口同聲推說自己工作忙,暗指無睇過ViuTV的節目。

FYY捧6號「好好嘅前輩」

FYY先為6號護航:「佢成日喺《#後生仔傾吓偈》幫我哋打圓場,我哋成日講錯嘢吖嘛,後生仔好易衝口而出講錯嘢,好彩有你(6號)幫我哋兜。」6號指自己:「冇所謂,我最欣賞後生仔嗰種創意,同埋嗰種豁達心態。」FYY聞言再讚6號:「難得你又豁達大方,唔介意我哋講錯嘢,你真係一個好好嘅前輩。」

問6號會否介意193的言論?他即說:「冇乜所謂,最緊要好玩,最緊要開心,都多謝佢有留意我哋,我都希望大家畀心機做好節目,亦都希望佢哋加油,我哋做唔同節目,都係觀眾得益。」

6號自喻領隊

FYY大讚下周一(26日)便42歲生日的6號keep得好,仍然咁young,他笑說:「梗係啦!我朝朝早去晨運。」講到被指「keep得好」不是一種讚美,FYY即狂兜:「如果我第時都可以keep得咁好,永遠保持心境咁年輕,唔使我明明26歲,啲人誤以為我30歲,我要向你學習。」

問6號主持《#後生仔》會否覺得尷尬?他說:「其實唔會喎!主持人責任係帶到一班大學生、年輕人講到佢哋講嘅話題,我就好似一個球隊嘅領隊,好得意,啲網友話小朋友節目係咪要搵小朋友呢?好搞笑呀!」記者提醒他有些兒童節目的確由小朋友做主持,FYY便圓說:「如果一大班小朋友冇人睇住,個節目做唔成。」

爆曾志偉騷後檢討

問到6號有無收看ERROR的節目?他直言任何電視台的節目都會看。問到是否包括ViuTV節目呢?6號只說:「咩節目都鍾意睇,例如新聞性嘅節目。」再追問他有否收看ERROR的節目?一直指自己有看ViuTV節目的他突然轉口風:「時間方面,我都想睇到,但實在太忙,《開心大綜藝》日日要綵排。」FYY亦幫口:「《#後生仔傾吓偈》廠景加直播去到夜晚12點幾,好難喺屋企坐定定睇電視。」會否因為193太寸嘴而不想看他的節目?6號說:「如果有好睇我都會睇,台灣嗰啲會睇、韓國呀,甚至去到俄羅斯有好睇嘅節目,我都會睇。」他認為大家應該要互相支持。

提到無綫副總理曾志偉曾經指ViuTV節目偏門,兩人認為《#後生仔》和《大綜藝》才是偏門,6號說:「百貨賣百客,總有啱睇嘅人,多啲類型更加開心。」問他們不收看隔籬台如何做到知己知彼?他們均表示要留意美股。

早前自稱是「姜糖」的FYY沒有留意ViuTV節目?提到可以上網重溫,她辯解最近工作忙碌,每日都要綵排。擔心被「姜糖」狙擊而不敢再提姜濤?她說:「又唔會喎,如果fans知道有人支持自己嘅偶像,其實係開心㗎嘛!證明自己嘅偶像多人認識。我之前都有追Super Junior,認識到唔同fans係好開心,只不過近排工作太忙。」

對於網民指無綫直播節目《大綜藝》,睇完都唔識笑,他們透露事前要綵排,事後會開會檢討,又指曾志偉亦會給予意見,問到有甚麼意見,6號卻說:「其實冇㗎!」FYY再幫口:「係問我哋有咩意見,佢想聽多啲唔同嘅意見。」她直言仍有很大的進步空間。

對於無綫大股東黎瑞剛早前在專訪中直言對無綫「非常不滿意」,指飲食節目氾濫,無綫即時下了「限廚令」,6號與肥媽Maria Cordero的《食平D》系列大受影響,他說:「我覺得係好事,綜藝節目應該要多方面,係新景象。」

聞余詠珊即劃清界線

另一方面,講到余詠珊將會在本月底辭職,「愛將」6號有否聯絡對方?他似乎想與對方劃清界線;「公司有任何同事離開,我都感謝佢哋對公司所作出嘅貢獻,我都祝福佢哋,希望有新發展。」追問有沒有跟余詠珊聯絡?他窒了一窒:「嚟緊可能會問候吓!」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner