自薦代言丨193@ERROR親證「洽商中」 反省隨口噏:唔知自己咁有影響力

更新時間 (HKT): 2021.04.21 21:28

新增內容

組合ERROR自出道以來,人氣、吸金程度始終不及組合MIRROR,去年ERROR成員193(郭嘉駿)在IG撰寫千字文呻沒有工作,而且好羨慕MIRROR:「喂!大佬我喺英國讀心理學㗎,而我自問轉數都幾快而且識講嘢,但冇人會搵我去做正經節目,因為我係ERROR。我亦都好羨慕MIRROR會有唔同嘅時裝品牌搵佢哋好型好chok咁拍廣告,收錢着住時裝品牌嘅衫出event。」

知道你咩料

不過ERROR今時唔同往日,193近期紅到爆燈,早前寸爆無綫,「得幾百部電視機」、「40幾歲仲話後生仔傾偈嗰個?」「而家仲用五虎呢啲字咁娘咩?」大膽講出現時不少人的心聲,完全體會到193的口頭禪「知我咩料啦」,難怪他被網民封為「娛樂圈清泉」,193隊友、fans更以「三爺」來稱呼他,不過193日前出席ViuTV音樂頒獎禮,他當時表示:「我想叫返我三哥,希望可以有吓代言。」

193代言有望

193講到出口話想做代言人的米線店,翌日已經在facebook專頁留言「打緊畀花姐,三哥巧有feel」,隨即得到大批193 fans支持,更留言提議推出「三爺套餐」,亦有網民在討論區留言「香港人養返香港藝人」。

《蘋果》聯絡到193,他表示:「多謝大家嘅支持,我唔知自己講嘢竟然會咁有影響力,以後會慎言,小心啲講嘢。目前所有嘢都係洽商中,因為我檔期……而家仲拍緊節目,每日都拍緊,就算放假啲時間都已經mark咗啲廣告去拍嘢。整體嚟講都係想多謝返啲網民嘅支持,我會繼續努力工作,希望網民留意我之餘,都會留意埋ERROR嘅所有嘢啦,因為我哋5月3號就有個新節目《ERROR自肥企劃》出街,都係《花姐ERROR遊》嘅班底嚟嘅,我留意到自從我嗰單新聞出完之後,好多人睇返ERROR嘅舊節目,最多人睇就係《花姐ERROR遊》,今次係同一個班底,希望佢哋密切留意我哋嗰15集長嘅節目。」而他更預告會有驚喜畀觀眾:「去到節目嘅後期,我會帶到一個對我個人嚟講,一個好大嘅驚喜畀觀眾。」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner