YOLO的練習曲丨紋身女Helen樂意做陪襯:唔攻擊我已經好滿足

更新時間 (HKT): 2021.04.22 00:00
擁樂觀心態的Helen,坦言給自己3年時間在娛樂圈打拚。

娛圈如戰場,能夠生存的,除了有勝過別人之處,心態上亦需時刻保持正面樂觀。今年23歲的蘇凱倫(Helen)和Candy黃曉文(別名:黃曦誼)一樣,既是太陽娛樂新人,亦是《YOLO的練習曲》20個美少女其中一成員。比起同公司的Candy,Helen的演藝夢相對較崎嶇。由於Helen在劇中並非5位要角之一,因此對白和戲份相對較少,雖未至於湊數戥腳,但亦似乎未能讓人留下深刻印象。Helen日前接受《蘋果》訪問時,卻樂觀地說:「始終我係啱啱入行嘅新人,簽經理人公司都係4個月時間,唔同其他同劇嘅女仔咁多人識,只要大家唔好咁攻擊我,唔需要太關注我,我已經好滿足,某程度上唔攻擊我,就代表接受我啦!」

冇後悔紋身

留有一頭齊陰長髮的Helen,外表比想像中嬌滴柔弱,不笑時樣子有點冷和兇,但天生愛笑的她,每當露出梨渦淺笑,又會教人如沐春風,可是,在甜美笑容下,身上卻有被外界視為反叛的印記,反差確實有點大。而大大小小的紋身,記錄了Helen不同成長的過程和領悟,但同時亦阻礙她的星途。「之前casting十次有九次都唔中,哈哈,可能係我表現唔好,唔符合客人嘅需要,或者市面上有太大競爭!自己又冇咩獨特之處!」說到尾,Helen認定客人冇揀自己,是由於自己先天不足,卻不認為是紋身累事。明知紋身跟一世,但Helen表示每次紋身都是經過深思熟慮,並非玩玩吓,因此要對自己行為負上責任亦未感後悔。

後生輸得起

Helen和Candy一樣,同樣是在IG被現時的經理人發掘入行,對於casting十次有九次失敗經驗的Helen來說,原本對《YOLO》面試不抱寄望,到頭來卻偏偏被選中,連她也感到難以置信:「本身有做開IG網店嘅model,中學畢業後一直做freelance接job,我casting《YOLO》嗰陣,都冇乜技能show畀人睇,見我嘅導演問我有冇聽K-pop,咁細個都鍾意聽吓跟吓跳,但同專業相差好遠,好老實講,都唔明導演為乜揀我,不過記得嗰日男朋友有陪一齊去,或者因為有佢傍實,信心會大啲,其實佢都好支持我去做自己鍾意嘅事。」

眼見拍劇時,身旁女生無論唱歌、跳舞周身刀張張利,小時候只學過跳中國舞的Helen,確實有點蝕章,雖然「輸在起跑線」,但Helen坦言趁後生可以輸得起,就當給自己3年時間,完成這個短期目標再審視將來都未遲。「反正而家嘅經理人問我有冇興趣簽公司,既然自己後生,對呢行有興趣,阿爸阿媽又冇反對,覺得唔好嘥咗呢個機會,得唔得都好,咪當記錄一下自己人生!」

要肥仔唔要姜濤

提起男友,Helen沒有太多包袱,不過記者即場讓她選MIRROR其中兩個隊員Ian和姜濤以及ERROR四子做理想對象,她卻有點忌諱,思前想後,才說心目中的理想型是「肥仔」梁業。「咁我未入呢行前,同肥仔喺一個主題樂園合作過,佢係其中一個表演者,我就係照顧佢哋嘅工作人員。肥仔好識用肢體語言去搞氣氛,喺團隊入面佢係做開心果角色,冇佢嗰日就會特別悶。」要她幫好友Candy揀一個對象,她亦火速揀肥仔。「Candy曾經講過,佢成日睇肥仔跳舞,覺得佢好勁,Candy之前都有同肥仔合作過,可惜係時間太短,佢講過話好想再合作,所以唔使諗一定揀肥仔畀佢。」問她揀肥仔唔揀姜濤或Ian,是否肥仔已名草有主還是欠缺殺傷力?Helen即答:「我都鍾意靚仔㗎,肥仔好靚仔呀,你哋唔覺咩!」

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner