YOLO的練習曲丨姜濤緋聞女友 19歲Candy性格慢熱慘被男友飛

更新時間 (HKT): 2021.04.22 00:00

ViuTV向來懂得審時度勢、捉緊觀眾口味,早前趁5周年推出別注節目《YOLO的練習曲》,以偽女團成員的成長作故事背景。無可否認,20個女生一致穿上窄身短裙水手服,總能勾起男生對那種帶點誘惑的純愛慾望吧,看看連登開post的數量便略知一二了!

5集短篇故事,就如時下的速食文化,快來亦快去,20個女生的臉孔,相信你未必記得幾多個,當中,今年只有19歲的女主角Candy Wong黃曉文(別名:黃曦誼),早前被爆和人氣王姜濤在情人節前夕,IG顯示在中環「偶遇」而被指暗交,兩年前她又在姜濤與陳卓賢(Ian)的ViuTV音樂電影《戀愛要在生日前》中擔任女主角。命運使然,剛出道的Candy注定成為焦點。日前Candy接受《蘋果》訪問,性格內斂慢熱的她,對着鏡頭連自我介紹亦一副正襟危坐模樣,面對突如其來的緋聞,Candy更加顯得手足無措,她說:「我真係冇同佢(姜濤)拍拖,事實佢同Ian都好nice,同佢哋合作嗰陣好愉快,但合作完真係冇乜聯絡,我都冇諗過會傳緋聞。」說時一臉誠惶誠恐。

網絡被狙擊

愛情路上,沒有對與錯,可是和姜濤傳出緋聞後,即使Candy再三否認,但依然承受不少網絡攻擊,在一片被指借偶像博上位的謾罵聲中,Candy心情一度跌至谷底,其實擁有標致五官的她,男朋友理應小心呵護,可是,Candy透露自己幾年前試過拍拖,到現在卻已回復單身,更是被分手一方。她苦笑說:「我係被飛嗰個,都hurt呀!冇拍拖都一段時間,或者我講嘢唔叻,比較靜同慢熱,同人講講吓就冇咩話題,所以冇乜人追。」誰會想到擁有無敵青春的Candy,竟然沒有裙下之臣。

處女作遭父母笑戲屎

Candy是家中獨女,是父母眼中的掌上明珠,可是,Candy處女劇《YOLO的練習曲》出街後,她卻成為父母的取笑對象。Candy帶點尷尬傻笑說:「拍完呢套劇,發覺自己真係表現得好差,哈哈,要同觀眾講聲『唔好意思,要你哋睇我咁嘅表現』。」問到認為自己哪方面差,Candy毫不猶豫說:「演技差,照稿讀,尤其有次要對住鏡頭講對白,之前拍微電影講對白,聲線都冇咁平!」Candy指表現不好的其中一個原因,是壓力大、顧慮多成為障礙。「因為覺得呢套係劇集,會多人睇,心諗點都唔可以衰畀人睇,所以就特別緊張,呢個心態唔好,想喺呢行發展,我知一定要改!」Candy指有晚她和父母坐在家中看自己演出,媽媽邊睇邊搖頭說:「真係搞唔掂!」爸爸更笑說:「你睇你,真係好似讀稿咁,都話之前陪你練吓先去拍㗎啦!」其實記者有看Candy這部處女作,演技當然有待進步,但以第一次拍劇,而之前沒有上過任何增潤班來說,Candy算是及格有餘了。

IG被睇中以為遇神棍

現時在大學就讀文學史系的Candy,入行短短兩年,IG已擁有4萬多fans,說起入行經過,同樣關IG事。「16歲嗰陣,有日經理人姐姐喺IG留言畀我話想見一見我,開頭都有戒心,以為佢係騙子,因為當時好多類似嘅騙案,加上佢又冇icon,我仲諗緊如果真係呃我,我會點整蠱佢,傾傾吓先知係呢度嘅公司地址,反正自己有興趣,咪當嘗試吓,簽約嗰陣爹哋媽咪都有陪我上去。」Candy指自己IG的照片通常只放一般家庭生活相,至於經理人何以獨具慧眼,Candy至今沒有深究。「其實自己冇乜專長,跳舞、唱歌都唔識,拍完套劇先知冇乜拎得出嚟畀人睇嘅嘢,心急?有呀,尤其見到企隔籬嗰個咁勁。所以呢個係好好經驗,畀我見到自己有幾咁不足。」19歲女,還有大把時間自我增值吧!

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner