蔡少芬孖姊妹組女團自誇最靚 被老公嘲普通話「冇得救」

更新時間 (HKT): 2021.04.22 18:42

蔡少芬(Ada)、朱茵、陳法蓉(Monica)及洪欣相識逾20載,最近自組女團「港普F4」,將會首次合體參加大陸真人騷《請吃燒烤的姐姐》。Ada日前出席活動時,自誇是四人之一顏值最高,她笑說:「唔駛講,我從來都冇話過我最靚,不過真係唔駛講,第一,四個之中,我最年青(47歲),高度嚟講,我係最高嗰個,樣靚身材正呢家嘢,真係好難講。」提到四人之中,邊位普通話發音最「港普」?Ada再次發揮搞笑本色表示:「佢哋三個都好港普,但我唔係,我啲普通話比較清楚,我應該係最標準。」是否向老公張晉惡補普通話?她說:「唔需要,我老公話冇得救,仲話我學好咗就冇得笑,不過佢係錯嘅,我覺得我已經學得好好。」

原來Ada與幾位姊妹一直有個共同夢想,希望合資開舖做生意,在節目中,她們便一齊開燒烤店,預計火花四濺:「我哋關係太好,好到有啲爛,好驚火花一擦就燒着大家,因為我哋每個人性格都好獨特,平時我哋私下玩,都會有鬧交、唔開心嘅時候,所以我哋相識咁多年,一齊工作應該會有火花,不過會係好嗰方面。」

Ada深信四人一起做節目,一定會有默契,互相發揮專長,她說:「我應該負責搞氣氛,好多時四個人一齊食飯,我都係主動啲、搞啲笑,朱茵就係笑吓掛住食嘢,洪欣比較多嘢講,但會由頭講到尾,我就會講『其實你講重點得』,至於陳法蓉博學多才,喺節目可以提出好多得意問題。」Ada 續說真人騷,只要夠真就會好睇,她笑說:「其實佢哋真係要向我請教,我係佢哋老師,無論咩類型真人騷我做咗好多,而佢哋經驗太少,哈哈哈!」

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner