Suzuki家族遺傳身高150cm 感情空白恨拍拖:她要面對身邊人壓力

更新時間 (HKT): 2021.04.23 06:00

過去一年因為疫情,大家聽得最多的是「應保持1.5米社交距離」,究竟1.5米又有幾遠距離呢?相信李建邦(Suzuki)絕對有資格告訴大家。

今年28歲的Suzuki,外號叫「國民情夫」,不論橫睇掂睇,他的身高正正就是150cm,即是社交距離1.5米。然而他的風趣、幽默性格,沒有令人有距離感,反而更拉近關係。早前他在尖沙嘴接受《蘋果》訪問,談及他的身高,他直言是遺傳︰「係家族遺傳,我父母同哥哥,親戚都唔係好高,(有日本人嘅血統?)都算係,我已經隔咗兩、三代。」

10歲後再沒長高

在別人眼中,可能會覺得Suzuki對自己的身高存在自卑感或沒信心,而他卻肯定的答你︰「喺演藝方面,心態上知道呢個係自己嘅賣點,或者人哋會欣賞我嘅身高,喺呢行發展,我信心反而大好多。」他坦言小時候曾遇過欺凌,令他有丁點自卑,幸好他懂得保護自己,「我會同對方嘈一、兩句囉。」即使輸陣,也不能輸個勢。

自小喜歡運動的Suzuki,足球、籃球、田徑皆是其愛好,但偏偏他從小學五年級開始沒有再長高,「好似讀緊五、六年級左右,就停咗長高,小學我都有打籃球,但都冇明顯增高,自己都知高定咗,亦都接受咗。」在生活上,身高對他來說絕對是有一定的影響,如買衫、坐車、去廁所。

尿兜太高遇反彈

行入服裝店,Suzuki總會感受到奇怪眼光,「買衫真係好大嘅煩惱,男裝好少細碼,好難買到衫。老實講我冇乜選擇,唔使人哋講童裝喺邊,都好自覺咁行去童裝部。尷尬?一定有,啲媽咪又會望吓你係咪小朋友,啲表情好奇怪。我又唔可以同小朋友揀同一件衫,又要避開啲卡通款;褲又係,買親褲都要改,改完成個cutting又唔同晒,真係好煩惱,所以想搞個自己品牌design啲衫。」

至於乘坐交通工具,Suzuki當日就自拍一段乘坐地鐵的片段,他坦言不時遇到尷尬位,「好似坐地鐵,如果遇到人多時被夾住,又掂唔到扶手,可能伸手嘅位置係人哋胸口或者胳肋底位置,好尷尬。坐小巴,坐正最後排,司機成日以為仲有位。」至於生活上,亦有好處和壞處,他說︰「好似喺觀塘,人多車多時,可以左穿右插,又可以買小童飛。不過有時去公廁,我都係入廁格解決,因為個尿兜未必有咁低,太近好容易彈返轉頭,整污糟好尷尬。」

做街訪向女仔表白

以他的高度最適合當騎師,8年前他曾加入馬會接受訓練,「因為嗰年讀完書,諗住搵份工做住先,馬會請人咪去試吓。我都幾鍾意騎馬,入面訓練好規律好嚴肅,後來情緒唔係太好,大家都擔心我嘅健康,見我壓力好大,導師都叫我休息,後來就離開咗。」假如當日沒有放棄,現在的他已是騎師,「都係㗎,同學已經係近年新星,好似潘明輝。可能我而家嘅路會好唔同,生活上、感情上少咗煩惱,騎師身邊啲女伴,級數都幾好,我都幾羨慕,可能不至於而家感情咁空虛啦。」

談起追女仔,Suzuki坦言算是「矮仔多計,識𠱁女仔」,可是至今仍感情空白,「我有拍過拖㗎,我啲女朋友都OK㗎!」問他為何未能繼續發展?他說︰「身高未必係好大因素,對方選擇同我一齊已經知道,可能係之後嘅相處,佢要面對身邊人嘅壓力。」他坦言有兩、三位前女友都是高過他的,而他身邊又以女性朋友居多,問他如遇心儀對象,但對方好高,會否如王祖藍追李亞男般,作高難度挑戰?他笑言︰「首先我要做到好似祖藍咁嘅成就先,我會試,成功機會唔大,但一試無妨。」

訪問當日,Suzuki接受挑戰,親自落街做街訪,訪問後生女會否接受他做男朋友?他在街頭拿住自拍器材,先後向20多位女性提問,可是「食檸檬」居多,成功訪問到的只有3位女性。雖然她們對Suzuki沒有抗拒,但礙於已有男朋友,未能接受Suzuki,事後他在街頭大大聲唱歌曲《高妹》,「我沒有5尺高,我卻會待你好,我會接受你一切的改造」,為自己打氣。

向古天樂自薦

即使追不到女仔,演出要扮卡通人物,甚至加上在電視台多是當「下把位」,他從沒有怨言,「我幾接受做下把位,都幾啱我做,同前輩合作俾佢哋恰,都係對你嘅肯定,係我一個優點,反而想佢哋恰多啲,效果會好啲,觀眾更加記得我。」5年前ViuTV開台招募演員,他便膽粗粗去嘗試,到了今年1月他約滿離開,回復自由身。「其實離開ViuTV,覺得呢幾年發展都係差唔多,想跳出呢個舒適圈,唔係我會好懶散,團火會少咗。」

適逢大台近排要吸納演藝人才,問他會否自薦?他說︰「我真係冇特別去諗,如果要自薦我會考慮天下一(古天樂旗下公司),我覺得佢哋未有我呢類走諧星路線嘅藝人。」隨即叫他向鏡頭前自薦,他即擺正甫士說︰「Hello古生,最近知道你做咗電影工作者會長,做得呢一行,同你都會拉上關係,我覺得同你嘅關係可以親近多少少,我哋不如親上加親,簽我返去呀!」希望古生看到。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner