鄭中基留Keyboard吉位悼念Gary Tong 演唱會開場螢幕播獅子山

更新時間 (HKT): 2021.04.23 20:40

鄭中基今晚在中環海濱活動空間舉行香港首個自駕演唱會「WEE are Ronald Cheng Drive in Ultra 鄭中基自駕演唱會2021」頭場,由於仍是工作日,頭場時間安排在晚上8點,周六、日兩場晚上7時半開始。車輛觀眾位在台前最前排位置,其後方是觀眾座位,大會指,頭場有116架車入場,記者現場觀察,頭排車位有多款名車,包括法拉利、保時捷、瑪莎拉蒂、林寶堅尼,亦有人揸開篷車入場睇騷,相當識玩,而鄭中基老婆仔女、爸爸、外父外母坐Audi睇騷,獲安排車輛觀眾位,對正台中心。

今晚睇騷的嘉賓除了見到鄭中基在ViuTV劇《暖男爸爸》的好兄弟強尼及同劇的岑樂怡,另外亦見到王菀之、余香凝夫婦、林二汶、林日曦、釗鋒@C AllStar、鍾舒漫、王馨平、關伊彤、黃又南及孫慧雪夫婦等。大肚婆余香凝說約了《暖男爸爸》其他成員睇騷:「特登嚟撐場,陀住BB都嚟!喺《暖男爸爸》合作過,因為小暴龍哥激發母愛。」由於今晚坐坐位,身旁都多人,她笑說所以老公要入場照顧,並已準備了所有大肚婆用品,BB將在夏天出世,已儲落了一大堆BB衫,她又透露之前都有睇RubberBand演唱會:「啲人企起身,我都有企一陣,好開心!」

《人若然忘記了愛》掀幕 獅子山做背景

演唱會預8點開騷,不過終於都要等到約8點15分左右,才播出由鄭中基囝囝錄的開場白,叫觀眾預備。演唱會以《人若然忘記了愛》掀開序幕,背後大螢幕播出香港各處風景,有獅子山、煙花匯演、港人戴口罩,亦有機場情人相擁,片段最後是維港日出海景,希望日出可以帶出希望的感覺。他又說以往每次演唱會都邀請已離世的Gary Tong做keyboard手,今次特別準備了兩個keyboard位,台上所見其中一keyboard位留空,似是特意悼念Gary。其後接住唱《救救我》、《學神》、《八爪魚》、《星光伴我心》,之後再由台中心降回台下。

今次自駕演唱會有兩排車輛觀眾位,票價為6,000元,但演唱會開始不久,已有車位觀眾落車睇騷,車輛觀眾位變成「名車展」。

第二part由《猛龍特警隊》開始,鄭中基換上一件灰長褸。唱完歌,鄭中基嫌觀眾靜,叫觀眾畀啲聲聽下,然後又說:「對上一次演唱會話咗齋唱唔講嘢,頭先我找咗數,一口氣唱。大家跟我一齊wee,戴咗口罩我都知你哋有冇嗌,因為會郁,要嗌到對面海都聽到!歡迎大家嚟到我香港第一次演唱會,係真嘅第一次,之前喺九龍,可以話係成就解鎖,下次去新界,之後可巡迴,香港九龍新界,我信你哋會嚟。」然後又叫觀眾玩燈牌,又搞gag說憑飛尾可以睇part 2:「啱啱完成part 1,part 2而家開始。」之後與Joey Tang 合唱《心寒》、Patrick 與 Joey合唱《紅色跑車》,鄭中基再接力唱《只要你愛我》及《沒聽過的歌》。

在唱《晴天陰天雨天》前,鄭中基說有考慮過落雨情況:「啲人擔心落雨點算?我都擔心嘅,唔通又話你知咩!但準備定落雨就開遮或雨褸,開騷前有茂利問狂風暴雨點算?我一腳踢佢出去,呢啲唔係關心,係黑心!」他說今次揀歌時避開「雨」字,不過《晴天陰天雨天》只有三分一是「雨天」,所以冇事。

唱出《爛瞓》時,鄭中基身後播出關於疫情下受影響的人的片段,當中有素人外,也有確診第四期肺癌的前TVB藝人陳積榮,更有對方與女友的女友合照,而女友亦在照片上寫着會支持陳積榮。當歌曲完結時,螢幕亦顯示「世界如何變但有你」,場面頗為感動。唱完《緣份無邊界》後,鄭中基又指每個人都如lego,在不同崗位下合作,「現場手足你哋做到我有如天王巨星,所以人人係鄭中基,一個都不能少,相信未來嗰個鄭中基,知道你哋支持會好開心。」到了介紹樂隊環節,鄭中基先介紹在場樂手,之後就收起笑容話:「我哋仲有另一個keyboad Gary Tong。」

鄭中基在唱完《無賴》便落台補妝換衫,再上台唱《時間、人物、地點》及演唱會主題曲《玩咗先至瞓》,他更邀請現場觀眾做這首歌MV主角:「現場有好多鏡頭,識唱跟住唱,總之個樣好high,好開心,麻煩晒,拜託!」

之後介紹嘉賓RubberBand出場時,鄭中基表示請嘉賓一定會揀自己喜歡的,亦相信大家都會鍾意RB。RB上台與鄭中基合唱《發現號》,唱完與6號擁抱後說:「RB開演唱會叫Ciao,講聚散,以為佢哋散band,原本請佢哋嚟復出,點知搞禍咗。」6號聽完後就笑指4月23日RB宣布解散,之後他叫暴龍哥用廣西話講RB復出,鄭中基即用廣西話講:「我喺呢度準備幫呢條橡膠筋正式復出。」到唱《未來見》時,6號表示本來想用廣西話唱,「但呢首歌送畀香港人,所以唱番廣東話。」

鄭中基在唱出歌曲《廢中》前說:「呢首係Gary Tong做,以前我每次演唱會佢都幫手做,佢跟得足,仲會做多,所以佢喺度好安心,咩都幫我搞。希望大家開燈幫手唱《廢中》,送畀Gary Tong。」Gary Tong keyboard亦上放了一束鮮花。

開場前亦有小插曲,在9號碼頭旁的入口附近,有警車停泊,警員在場巡視,見有人群聚集便以限聚令為由勸喻散開。

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner