鄭中基落雨斷電未驚過 心郁搵風季以外時間開part 2

更新時間 (HKT): 2021.04.25 23:58

鄭中基首個香港戶外音樂會,亦是第一次設自駕車輛觀眾位,尾場在大雨中閉幕,為3場演唱會畫上句號。他在演唱會中自嘲《晴天陰天雨天》有預知能力,3場分別經歷了晴天、陰天、雨天,尾場更因落雨令音響失靈,他完騷後接受訪問說,沒有預計過會斷電,多謝所有工作人員跑來跑去解決問題。

鄭中基又講笑說,有問工作人員拎大聲公唱歌:「我有問現場有冇大聲公?如果真係唔掂,我就用大聲公唱啦,琴有聲就可以照唱,如果冇就拎大聲公唱喇。」他說音響器材跳制,好彩全部都可以如常運作:「之後工作人員都包咗好多膠袋,我見佢哋都濕晒,個個都好辛苦,我就話有衫換,但台上band冇,即刻搵衫畀佢哋換。」他說第一次在香港舉行戶外演唱會,好多事都是初次嘗試,過程好難忘,又再次多謝製作單位:「佢哋盡咗好大努力去做,我自己能夠做到只係個show嘅內容,今次真係真係分工合作將件事砌出嚟。」

老婆余思敏及一對仔女睇晒3場演出,鄭中基即展示暖男爸爸一面:「今晚兩個細路都濕晒,老婆都濕埋,我即刻叫佢哋返去換衫,小朋友聽日仲要返學。」講到有慈善團體多謝他贈飛,助手表示有8間機構受惠,3場合共送出了1,500張飛,鄭中基解釋今次演唱會好多第一次,希望可以有更多人享受:「因為呢個show係第一次搞,呢段時間我睇咗好多新聞,香港有好多比較弱勢同基層家庭,可能真係會成世都冇機會睇到一個演唱會,所以我搞第一次,請多啲小朋友睇。開心就好,都係希望大家開心,大家太耐都唔開心,做到幾多就幾多,以後盡量做。」

今次落雨停電沒有嚇怕鄭中基,他說可能會有part2:「如果之後多啲時間準備,相信會好啲,不過落雨都冇得講,今次叫有咗經驗。我哋睇吓唔係雨季又唔係風季,有機會part2嘅。」

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner