東方昇半億音樂噴泉「沖涼」《造星III》50強不入沈瞳伽批歪風邪氣

更新時間 (HKT): 2021.04.25 17:07

耗資半億公帑興建的「小白象」觀塘海濱音樂噴泉,上周四(22日)已正式啟用,「100毛」主持王嘉偉(東方昇)昨日帶備沐浴露及泡泡玩具槍到觀塘海濱,一嘗音樂噴泉設施,來個實地「沖涼」測試,與一眾小朋友同樂,他在「100毛」IG分享片段,並寫上:「最近觀塘海濱公園耗資半億嘅音樂噴泉終於都開幕喇!用咗咁多錢,沐浴巨星東方昇決定物盡其用,喺呢座佢都有份出錢起嘅噴水小白象沖涼洗刷佢嘅大白象!」

網民寸沈瞳伽講支那話

東方昇的實地測試片段獲不同迴響,有網民指片段爆笑,亦有覺得音樂噴泉物非所值的人,認為東方昇以嬉笑手法反映時弊,不過,康文署就不點名批評東方昇,呼籲市民注重公德。曾參加ViuTV《全民造星III》不入50強的沈瞳伽,在社交網留言狠批東方昇「歪風邪氣」:「喺小朋友面前咁樣做係咪腦穿咗個窿?做傳媒可唔可以有番少少三觀?歪風邪氣。」沈瞳伽的激動留言引起網民討論,有網民表示對他毫無印象,因他連晉身50強的資格也未有,譏諷他是奀星,更有網民爆粗反寸沈瞳伽「咩X嘢三觀,真係大陸X先會用呢類team。」、「講埋晒啲香港人唔明嘅支那話」,鬧人反被寸的沈瞳伽,今午在社交平台再帖文:「有兩個鍵盤戰士走去我IG鬧我,此屬典型護主行為,呢個世界的確任何人都可以養狗,有啲人養可愛狗,有啲人養癲狗。」並同時關掉IG留言功能,不供網民留言。

腦細林日曦撐東方昇有權裸體

而被康文署不點名批評的東方昇,則在IG寫道:「等陣先~不點名喎,唔好咁誇獎我,未必係我嘅。不過,我睇晒個post樓下同所有平台嘅comments,好開心見到網民都好高汁,好明白事理,我對香港未來充滿希望。最後一句『公德自在人心yeah。』」對於被沈瞳伽指歪風邪氣,東方昇回應《蘋果》表示「冇回應。」而身為「100毛」腦細的林日曦回覆《蘋果》,撐東方昇有權裸體:「東方昇條友成日都搵機會除衫露體,係有啲肉酸嘅,公司啲同事都好不滿佢。但佢咁大個人,老實講,佢係有權裸體,我控制唔到佢。如果康文署有方法,我都好希望佢哋可以幫我勸吓東方昇唔好成日郁啲就除衫。」

梁栢堅讚「呢個係行為藝術」

而填詞人梁栢堅亦在社交網撐東方昇,「呢個行為藝術嚟」,揶揄曾有大媽在溪澗洗衫,「水泉澳鄒山上面邊個國家人喺度洗衫 #講公德真係傷人民感情」,大讚曾深入北韓的東方昇:「呢條友北韓都照玩使怕你」,梁栢堅回覆《蘋果》暗嘲:「康文署呼籲市民唔好喺泳池大小二便一樣,公德之前,原來有個私德,自私先得。」

其實沈瞳伽去年參加《全民造星III》前哨戰時,曾於台上懇求評判多給他一盞藍燈,讓他跌入復活區,但最終獲評判一致拒絕。他事後心有不甘鬧爆:「究竟呢個比賽,評判評分嘅準則係咪足夠專業?條界線喺邊度?係咪對每一個人都一視同仁?其實而家我哋唔係玩緊比賽,係俾人玩揀老婆、揀老公,完全睇唔出呢個係一個比賽。」

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner