ERROR自爆再開Talk Show叫觀眾期待 《自肥企画》直播宣傳保錡終破冰

更新時間 (HKT): 2021.04.26 22:25

ERROR下周一(3日)有新團綜《ERROR自肥企画》晚上11點播出,最近舊團綜受惠193爆紅而重拾收視,今日他們趁機開直播宣傳《自肥企画》,由於直播在晚上8時半開始,結果直播變成ERROR食飯時間,邊食邊講。

Dee、肥仔、193以「ERROR流忍者」造型出鏡,惟獨保錡沒有換衫並坐後一行,而且與宣傳片一樣,要舉「反省中」牌遮樣。直播中不斷有觀眾留言「free Poki」,初時保錡不敢出聲,肥仔見狀可憐,主動提議幫保錡夾餸,遭Dee取笑似監躉,肥仔再施好心提供甜品。

ERROR透露今次團綜一如自肥名義,會玩遊戲爭獎品,不過每周都有大懲罰。193說今次比較輕鬆:「如果《ERROR遊》有10分黐線,今次應該得3,4分。」Dee不同意:「今次起碼有7分!第一日開工不停望上面,驚佢哋丟嘢落嚟,大整蠱真係好癲,而家仲有陰影,等出街再講啦。」193說無論遊戲獎品,還是新一套「ERROR流忍者」造型,都用上節目製作經費自肥。肥仔說想拍劇做ERROR流忍者,叫觀眾去ViuTV總經理魯庭暉IG留言開劇。

新團綜下周起播,但原來節目現時仍未拍完,今日都有開工。ERROR又透露,原來早已計劃去年12月開ERROR talk show,不過疫情問題要褪至今年6月,但現時製作非常趕,未必能夠舉行,193叫fans期待。他們說最近太多新fans,只留意有舊團綜電視節目,並不知道ERROR成立初時開過talk show,肥仔叫觀眾可以上網重溫「西九遊記」。

過萬人睇ERROR直播

由於隊友不停將話題交給保錡,保錡才逐漸打破沉默,最初他只要求有牙籤撩牙,之後又搭嗲搞gag。直播高峯時有逾萬人收睇,保錡又叫睇直播的觀眾follow各人IG,193取笑公司買view,肥仔就叫觀眾追隨ERROR官方IG。

直播1小時內話題天南地北,出現不少「陷阱位」,例如睇直播人數多,Dee說以ViuTV super計法,會有80幾點收視;193建議拍ERROR流忍者只請女嘉賓,Dee取笑保錡唔拍得;肥仔篤爆以前193會自稱是「ERROR入面嘅姜濤」,現時人氣勁已經變成「MIRROR嘅姜濤」,不過193縮沙:「我瀨過嘢,我唔敢再呼籲人,叫返我3仔。」;保錡建議Dee去長者節目《樂齡日記》呃show錢,Dee反建議:「唔係我話要呃show錢,我哋期待喺《樂齡日記》見到保錡演出!」193就自薦:「最應該去係我,話我唔respect,話耆英呢個字係差嘛。」肥仔叫他去解釋耆英意思,193則說:「唏,唔使解釋,有文化嘅人就識,冇文化嘅人點解釋都唔識啦。」

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner