小儀改變阿媽睇電視習慣 花姐蹺埋雙手睇住囝囝受糟質

更新時間 (HKT): 2021.04.27 00:30

商台DJ阮小儀從2000年開始,由廣播界走入電視界,初時參與劇集演出,到了2006年與DJ拍檔森美合作主持綜藝節目,為她的演藝事業展開新一頁。直到2020年,有指因她曾經在反送中運動上表態而不被TVB續約,結束20年的合作關係。之不過,退一步海闊天空,離開TVB之後,小儀多了新嘗試,走勻香港開電視和ViuTV兩間電視台,節目形式亦比以往多元化。

本月初小儀、黃奕晨(Dixon)與MIRROR成員呂爵安(Edan)合作主持的ViuTV遊戲節目《考有Feel》播出,小儀直認「回春」!日前三人在九展接受《蘋果》專訪,雖然他們分別來自不同的年齡層,但聚在一起絲毫不覺得有代溝,看到小儀左右逢源的得戚模樣,實在令人羨慕又妒忌。小儀笑說:「我冇擺任何陣呀,我只係覺得天理係有循環,當你以前受過一啲唔好嘢,千祈唔好放棄人生,只要仲有一啖氣,就可以知道未來嘅日子係可以好精采。大家都知我以前喺隔籬台食咗幾多硬嘢,我唔講邊個,返咗台灣嗰啲呀,當佢話我係阿飄,話我好難哽嘅時候,佢又何嘗唔係呢?經歷過呢啲苦況,而家終於有好日子過。」

回春靠呢班後生仔

直認回春的小儀還說:「真係全靠佢哋呢班後生仔,回想番拍攝嘅日子都覺得好幸福,諗番轉頭當知道同佢哋合作嘅日子,仲要其中一個我近排仲做埋佢嘅小fans,我個心如鹿撞,不停卜卜跳,好彩姐姐我歷練夠,已經唔再好似以前咁,少女時代嘅我,唔知自己做啲乜嘢,會keep一啲形象。但係而家我唔需要,只要做番自己,所以好開心,好舒服又玩得happy,唔只佢哋令到我好幸福,係有16件仔(MIRROR及ERROR),原來以前皇帝啲後宮佳麗嘅感覺係咁嘅!」

面對前輩,Edan說:「佢真係神枱級人物,啱啱知道呢個消息,真係有啲怯,仲覺得開心又擔心,驚自己做得唔好,始終之前多數係玩,而家變咗做主持,對我嚟講係新挑戰,擔心唔識點hold,好彩有小儀,佢喺度傍住好放心,佢一定會hold大局!」反而Dixon不覺得有壓力:「完全係放心,佢會幫你,冇前輩嘅威嚴!」

最初小儀以為經理人花姐在場會勒住勒住,不過事實正好相反:「玩緊嘅時候花姐蹺埋手任你玩,叫你玩,又建議你點玩佢,成件事好放心。」玩得放,結果小儀對MIRROR及ERROR另眼相看:「初初以為佢哋有包袱,唔掂得,要愛錫佢哋,絕對唔可以玷污佢哋,但點知佢哋自動波,好投入,認真佩服,冇咗以前覺得佢哋係偶像嗰種感覺,係好親民嘅人。」

媽咪竟然會轉台

曾幾何時,電視台上大大小小的綜藝節目,都會看到小儀,但自她離開大台後,淡出了觀眾視線範圍:「做緊嘅時候唔覺,之後都有擔心過會冇,不過離開嗰邊之後,呢邊又已經搵,所以都冇擔心,只係一路押後,做咗其他節目先。」她更有感而發地說:「喺若干年前,我離開咗森美同金剛之後,都已經有呢一關,習慣咗同呢個人一齊,有森美喺度,佢會主持大局,我好安心做下把位。之後出咗去同金剛做,大家係平起平坐,同步嘅主持角色,發現呢個可能性係得喎,原來永遠就係唔跳出嗰樣嘢,以為永遠預期都係咁,唔會知道自己係可以做到,又或者唔會知道,原來你可以做到。」

小儀續說:「正如我由一個大台轉咗嚟呢度,好多人都會為我擔心,連我親戚都話少咗見我喺電視喎,因為佢哋係主要會睇嗰個台,好少會轉。但係我發現呢,我加入咗其他電視台之後,我改變咗佢哋,我媽咪竟然會轉台,甚至乎我返到屋企,見到佢睇緊唔係佢平時睇開嘅節目,估唔到我連媽咪都轉到喎,咁我就發現,原來有啲嘢係never say never,所以係一個新嘗試之餘,都可以畀到啲新嘢人哋。每一個藝人都想試吓新嘢,而家嚟到呢度,我係一個新人,任人雕琢,自己都覺得應該要玩唔同嘅嘢,喺呢度又好,又或者喺開電視都好,試嘅嘢係真係好唔同。」

Dixon:好憎佢哋12個

另一方面,近期ERROR的氣勢相當強勁,所到之處幾乎成為眾人的焦點,話題性更蓋過MIRROR。作為第一代ViuTV藝人,Dixon難免有點不是味兒:「以前好憎佢哋12個,我認真講㗎,我係冇睇過《造星I》!(我)嗰陣唔係真係太成熟,而家成熟咗,可以幫到佢哋。」但相處久了,Dixon發現他們的優點:「不過拍完呢個節目係開心,佢哋真係好努力,明白點解佢哋會有咁多人鍾意,唔係因為佢哋玩得夠癲,又或者夠靚仔而吸引到觀眾,原來而家啲新世代係咁樣做嘢。唔係乜都餵你食、餵你拍,係會發表你嘅意見,令到件事係work,所以我覺得有佢哋係好過冇佢哋,如果唔係呢個台係冇競爭力,當冇咗競爭力,自然冇嘢可以睇!」

Edan亦說:「其實係互相幫助,當合作咗之後,大家都會留意咗我哋,喺埋同一個台做嘢,大家都係戰友,一齊為呢個台努力!」小儀亦深表認同:「 我一直都希望工作環境開心,大家融洽,我好怕明爭暗鬥,對件事冇推進,反而覺得大家齊心去打仗,好鍾意呢個熱血感覺,呢個台就真係咁,大家都好鬼熱血去做。」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner