藍靖任《縱橫四海》助導見證紅姑辦嫁妝 同張國榮撞造型拍《戀戰沖繩》成波友

更新時間 (HKT): 2021.04.29 06:00

藍靖(Dave)今年就快60歲踏入耳順之年,年輕時在電影圈浸淫超過20年,跟影帝及影后都合作無間。講到印象最深的,非周潤發莫屬,Dave對發哥讚不絕口。兩人第一趟合作是1991年為吳宇森執導的電影《縱橫四海》開工,Dave負責幕後擔任執行監製,他說︰「嗰次梗係開心,可以同一班巨星合作,又可以出埠去法國巴黎開工見識世面喎。嗰次係第一次同發哥合作,佢好戲唔在講,仲好好人,對住其他工作人員唔該前唔該後,自己做到嘅嘢都唔會麻煩人。」

到1994年Dave為王晶導演《賭神2》做副導演,再同發哥合作,令他意想不到的是開工當日,發哥行到他身邊同自己講「Dave好耐冇見」,Dave回想起來還歷歷在目:「真係受寵若驚!發哥可以幾年後仲記得我個名,好感動、好叻,我覺得每個成功嘅人,都有佢哋嘅竅門。」

講到《縱橫四海》當然想起紅姑鍾楚紅同哥哥張國榮,當時紅姑好事近,拍完戲返去就同朱家鼎結婚。Dave笑言每日紅姑心情都好到不得了,紅粉緋緋完全是一個待嫁姑娘的心情︰「見到紅姑每一日都神采飛揚嚟開工,一收工就拉住服裝指導喺當地shopping,喺巴黎置出嫁時嘅嫁妝。」至於哥哥比較含蓄,不過同他相熟後就無所不談,Dave在戲外的皮褸更同戲中哥哥撞「造型」,他說︰「哥哥唔係好鍾意講嘢,但係好平易近人,冇架子。」

後來,Dave在《戀戰沖繩》擔任製片,再次同哥哥合作,當時二人已熟稔︰「沖繩都係陽光、海灘,閒時冇嘢做,就約埋哥哥去打網球。」成為哥哥網球波友,Dave每逢4月都會特別懷念這位故人。

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner