《超級學校霸王》訓導主任變身《激戰》教練 藍靖照顧90歲母拒北上搵銀

更新時間 (HKT): 2021.04.29 06:00

脫下《超級學校霸王》訓導主任的造型,眼前人是今年將屆60歲的藍靖(Dave)。藍靖離開影圈後轉職拳擊教練,瘦削的身形,體重卻有140多磅。他笑言跟劉德華同年屬牛,還年長對方幾個月,言談間似足《雷洛傳》龜公德「一言九鼎」的口氣。

為母放棄搵真銀

早前相約Dave在拳館做訪問,臨時收到他的留言,時間要推遲少許,事緣他要陪媽媽到醫院。最後他準時出現,講到母親的狀況,他聳聳肩說︰「老人家,轉天氣透氣唔順。穩陣咪同佢去律敦治醫院睇睇,媽咪90幾歲要小心啲。」父親離世20多年,Dave是家中獨子,母子相依為命。他說早在10多年前,大陸電影市場開始興旺,大量吸收香港幕前幕後電影人,當時他獲招手北上掘金,最終放棄機會,他解釋︰「十零年前轉行教拳,因為你如果仲要做電影呢個行業,差唔多要長時間返國內,一套戲要拍4、5個月,掉低阿媽喺香港,我係屋企裏面唯一嘅仔,離開香港就冇人睇佢,唔可以掉低屋企人去搵錢。」Dave話親人及家庭永遠是首位。

Dave在電影圈打滾超過20年,同周星馳、周潤發、張國榮同劉德華都合作過,片場所見所聞,他大讚劉德華無架子為人友善,非常難得,「佢對啲影迷好好,成日都叫佢哋早啲返屋企、讀書,唔好通宵達旦留喺片場,好似爸爸媽媽咁教誨佢哋。」講到星仔反而感覺他好嚴肅,好在大家都出身於李修賢的萬能電影公司,他說︰「大家識得,好啲啦,如果唔係喺現場見到佢,都幾驚,同銀幕前搞笑完全係兩個人。」

談及跟已故資深藝人吳孟達合作過《逃學威龍2》同近年《毒。誡》,懷緬故人,他稱達哥無論對幕前幕後都好有禮貌,凡事客客氣氣。其中記憶最深的是《毒。誡》有場戲,對手是劉青雲、吳孟達同陳觀泰,原本已背熟台詞,但在一班好戲之人面前,腦中忽然一片空白,已打定輸數捱鬧︰「佢哋冇畀壓力我,仲同我講笑。多得佢哋,戲好順利拍完。」

《激戰》任拳擊指導

同張家輝的合作,又是一次緣份。話說轉職教拳後,已較少參加電影工作,有一日返到拳館,見到一個熟悉的背影來問章程,過去一望,原來是張家輝,Dave說︰「我哋又係喺萬能時代已經識,家輝話林超賢導演想拍一套叫《激戰》關於MMA嘅電影,家輝嘅角色係一位過氣拳王。佢知我教緊拳,所以搵咗我幫佢執拳擊動作、姿勢,後來又收到製片電話,想搵我幫手跟場,做《激戰》拳擊顧問。」同家輝識於微時,對方一向少說話多做事,對自己非常有要求,亦希望合作的人做到最好。

其實Dave打得,學歷都不輸蝕,於加拿大留學,讀傳理系畢業。回港想過當新聞主播,先後去信兩間電視台,最後入ATV︰「其實兩間都請我,不過朋友同我分析話ATV啲導演好快唔撈,有晉升機會。最後做咗第一份工,係最孭鑊位PA(助理編導),原本捱咗幾年諗住到自己升,點知亞視大地震,招振強帶咗一班人入嚟,一朝天子一朝臣,所以就辭職。」轉攻電影圈,第一套戲做《至尊無上》助理製片,亦是首次粉墨登場︰「冇諗過做幕前,又唔係靚仔,冇對白。之後啲角色都係跟出跟入,把口又臭咁啦,其實我做人好友善,唔該前唔該後,可能樣衰,成日把口鍾意講笑,畀啲導演印象都係『招招積積』,口又臭,稱呼人少,得罪人多,所以成日搵我做呢類角色囉。」

《雷洛傳》做擦鞋仔

要數印象最深的角色,相信非《五億探長雷洛傳:雷老虎》中的「龜公德」莫屬︰「之前啲戲好多都係有跟幕後,順便撈埋幕前,呢部戲完全冇幕後跟。嗰時我喺永盛幫緊另一部戲做幕後,導演劉國昌成日喺公司見到我梳個蛋撻頭,就話『你個髮型啱嘞,啱晒套戲嗰個年代』,就咁搵咗我去試鏡,之後做咗秦沛手下。有句『一言九鼎』,我都記得呢句對白,係幾好笑。嗰時句對白自己度,好多時都係咁。」

Dave指習武始於中學,起初瞞住屋企人學跆拳道,成日同人切磋,對手是同學哥哥或者其他拳館的人,約好就到唐樓天台「講手」,會有拳證在場。有贏有輸,周不時打到口腫面腫,試過太傷不敢返家,他笑說︰「怕鬧,同屋企講話同朋友去三日兩夜露營。之後去加拿大讀書,學埋西洋拳,補跆拳道有腳冇手嘅不足。」80年代再到泰國學肘擊,離開影圈後將興趣延續,轉職拳擊教練至今。

講到最近「百萬林鍾一戰」,Dave話體重在拳賽佔很重要因素,重磅拳手較着數,他說︰「就算超重要賠錢,罰咗錢,唔代表公平。所以較重一方,要戴上重量大一啲拳套,減低殺傷力,就會公平啲。」但他講到明不會付錢「欣賞」這場所謂拳賽,笑言「睇電視好過」。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

娛聞樂陪你走遍全球追星,即Like「娛果」FB 專頁!
BannerBanner