【娛樂人物】難忘與哥哥打波 跟紅姑發哥見世面 
藍靖封片場散打王

更新時間 (HKT): 2021.04.29 02:00

今年60歲的藍靖(Dave),脫下《超級學校霸王》訓導主任的外套,離開影圈後轉職拳擊教練。Dave日前在拳館接受《蘋果》訪問,在電影圈打滾20年,最難忘1991年與周潤發、鍾楚紅及張國榮拍《縱橫四海》,他爆當年待嫁的紅姑在巴黎購嫁妝,又因此片與張國榮熟稔,後來更成為網球波友。

藍靖當年在加拿大大學畢業,主修傳理系,回港想當新聞主播,先後去信兩間電視台,最後入了亞視︰「其實兩間都請我,不過朋友分析話亞視有晉升機會。最後做咗第一份工,係最孭鑊位PA(助理編導),捱咗幾年諗住升職,點知亞視大地震,招振強帶咗一班人入嚟,一朝天子一朝臣,所以就辭職。」

發哥成功有原因

轉攻電影圈,第一套戲係做《至尊無上》助理製片,首次粉墨登場︰「冇諗過做幕前,之後啲角色係跟出跟入,可能樣衰畀導演印象招招積積。」但1991年《五億探長雷洛傳:雷老虎》中做「龜公德」,令他難忘︰「做秦沛手下,嗰句『一言九鼎』係自己度,幾好笑。」

Dave在電影圈打滾超過20年,對發哥讚不絕口,兩人首次合作是1991年的《縱橫四海》,Dave任執行監製,「好開心同一班巨星去巴黎開工見識世面,發哥好戲唔在講,對人好有禮貌,做到嘅都唔會麻煩人。」三年後兩人在《賭神2》碰頭,開工首日發哥主動跟他打招呼,「真係受寵若驚,發哥幾年後仲記得我嗰名,好感動、好叻,每個成功嘅人都有竅門。」

青雲講笑助放鬆

談到《縱》片,當時女主角鍾楚紅拍完戲就與朱家鼎結婚,Dave笑指︰「紅姑每日都神采飛揚,一收工就拉住服裝指導喺巴黎shopping,應該係出嫁前置嫁妝。」至於哥哥較含蓄,但兩人熟稔後無所不談,Dave在戲外的皮褸更與戲中哥哥撞「造型」,「哥哥唔鍾意講嘢,但好平易近人,冇架子。」兩人之後再合作《戀戰沖繩》已十分熟︰「閒時冇嘢做,就約埋哥哥打網球。」曾是哥哥波友的他,每到4月都特別懷念故人。除了發哥,Dave亦讚吳孟達隨和,兩人拍《毒。誡》時,原本背熟台詞的他突然腦中空白,但達哥及男主角劉青雲不但沒罵他,反而跟他講笑,令他放鬆後順利拍完。

撰文︰何永寧

場地提供︰DEF Boxing Gym

娛聞樂陪你走遍全球追星,即Like「娛果」FB 專頁!
BannerBanner