姜濤生日爆少男心事 大個仔唔抗拒拍拖但要問花姐

更新時間 (HKT): 2021.04.30 16:59

人氣王姜濤今日22歲生日,「姜糖」為冧偶像,豪花逾50萬炮製驚喜為偶像造勢,還講姜濤居住地銅鑼灣稱為「姜濤灣」。雖然姜濤今日生日,但MIRROR演唱會下周便舉行,所以壽星仔依然沒假放,今日仍要開工去綵排。

為了保持最佳狀態,姜濤工作前先出發做運動,今午12時半一身黑衫短褲波鞋打扮離開寓所去跑步,甫出大廈見到有傳媒等候,推開閘後便直出狂奔,向世貿方向快跑,先是朝着維園方向,後來回望見到記者追訪,他加速再跑,其間更拉下口罩到下顎位置透氣,之後姜濤更轉方向跑往灣仔,當追至會展後成功撇甩記者。

姜濤跑完步先返家稍事休息,大約下午2時許他換了一身黑色look又再出動,黑帽加口罩遮掩下只露出一對眼,他一邊行去世貿方向上車,一邊接受訪問。記者祝他生日快樂,壽星仔姜濤說:「多謝,唔好意思,我要趕住去排舞。」他指生日願望是演唱會順利,對於姜糖花錢在巴士站、電車和大型屏幕賣廣告祝賀他,姜濤表示今晚有意開live跟fans互動,問到可會跟姜糖搞補祝生日P,姜濤說:「補祝都演唱會後先決定,而家冇時間安排,我要準備演唱會,始終而家又疫情。」

插畫師設計姜濤誕紅日

姜糖為姜濤豪花逾50萬搞生日驚喜,姜濤都認同太破費:「我今晚開live講,真係好開心,但都心痛佢哋嘥咁多錢為我做咁多嘢,都開心佢哋有捐錢。」姜濤都大個仔,可恨拍拖?他說:「要問花姐喇!順其自然。我冇特別抗拒。」之後便衝忙上車趕去綵排。

姜濤在工作中度過生日,肥仔@ERROR更往綵排現場突襲探班,還給姜濤遞上一包蛋糕仔,隊友歡呼。另一邊鄭裕玲(嘟姐)今日在商台做節目也準備了一個蛋糕送姜濤,雖然壽星仔未能親到直播室切餅,但對嘟姐這位前輩的心意全收到,他更在IG留言答謝。

此外,今日有本土業餘插畫師「丹尼爾。海」在FB貼出為姜濤畫的一幅畫,畫中用日曆及他的肖像設計了一個「姜濤誕」公眾假期,上面寫上今日宜「放假」、「聽MIRROR」、「蒙著嘴說愛你」,同時忌「睇TVB」、「孤獨病」,業餘插畫師還搞笑留言:「今日咩日子?今日咪姜濤誕囉!點解仲未成為法定公眾假期㗎?」

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner