姜糖請假為姜濤慶祝生日 銅鑼灣貴價地段設打卡位供fans朝聖

更新時間 (HKT): 2021.04.30 18:48

人氣爆登的MIRROR成員姜濤今天22歲生日,全城姜糖早前豪擲逾50萬祝賀偶像生日,包括在多區大廈外牆LED大屏幕播放姜B的生日短片、「姜濤號」電車在石塘咀至北角線漫遊、銅鑼灣電車賣廣告設「姜濤站」畀姜糖免費打卡等,而fans club更在銅鑼灣超貴地段設舖位作姜糖打卡點,認真瘋狂。

銅鑼灣租舖派禮物

今天姜B生日,一眾應援團到「姜濤站」四出打卡兼派小禮物。姜B應援中堅分子、28歲的時裝設計師Jasmine就趁偶像生日,自發到銅鑼灣派應援物,她表示用了3星期時間籌備,親自設計生日卡、貼紙及「龍婆勁粗糙DIY匙扣」等,相當有心!Jasmine跟3位姜糖好友各自派發應援物,大受歡迎,不到1小時已派發完畢,之後她們便到處打卡。

提到喜歡姜濤的經過,Jasmine笑說:「其實我好膚淺,起初因為佢好靚仔,《造星》開始鍾意佢嘅,佢喺舞台上可以壓台,亦好謙虛有禮貌,好鍾意佢嘅真,希望佢可以keep到初心。今次為愛發電、講心唔講金,用咗大約500蚊、自己設計應援物,大家收到開心,我就開心,對我嚟講有減壓作用。之前試過喺佢生日租一架雪糕車派雪糕,目的係想多啲人認識佢,追星係好開心,佢表演得開心,我哋都開心,而我好感恩因為追姜濤識咗一班朋友,由唔熟到而家乜都傾。」Jasmine衷心祝福姜濤說:「你做自己想做嘅嘢,我哋就會喺背後支持你,保持初心!」

過千人報名攞應援物

除此之外,fans club在銅鑼灣百德新街設立一個地舖,佈置成為「姜糖天地」,招待已報名的fans club會員打卡。現場有3個打卡位,包括3個1比1的姜濤人型紙板、放有「姜字燈牌」與姜濤迷你公仔、以及寫上「姜濤濤22歲生日快樂」及人像的大型佈景板,現場播着姜濤的歌、佈滿氣球、派發應援物,相當有氣氛。

據知地舖是由一名姜糖借出,今天開放時間由1時半至6時,有700名姜糖報名入場外,有1,000人報名在舖外取應援物。記者下午2時半左右到達,舖外數百老、中、青姜糖絡繹不絕。現年8歲的心心親自畫姜濤的cute版人像印成生日卡,她不但懂得唱《蒙著嘴說愛你》,更冧爆說:「姜濤生日快樂!我會係你一世嘅小姜糖。」

「50+姜糖」唱生日歌

3位「50+姜糖」Cinnie Choi、Winnie與Teresa來銅鑼灣打卡兼取應援物,她們更唱生日歌給偶像祝賀,Cinnie更當姜B是自己個仔看待:「《造星》一出已經鍾意佢,佢純品、認真、投入嘅精神,我哋好注重人品,我第一次咁癲,付出咁多時間喺姜濤身上,佢值得我哋支持。」

4名「姐姐糖」Ling、Slim、Toto與May一同請假為姜B慶祝,她們因姜濤而結識,並成為好友。4人本來約好於今天穿上黑色T恤「制服」結伴到銅鑼灣四出打卡,,但May卻穿了一套便服,原來這是她在出席姜濤20生日會時所穿,別具意義,May說:「我諗住以後佢每一年生日,我着返呢套衫。」

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner