193出蠱惑借師傅「法力」贏試食環節 MIRROR嚇到O晒嘴

更新時間 (HKT): 2021.04.30 13:37

當大台努力以創意「抄巧」做節目時,ViuTV人氣節目《考有Feel》昨晚播尾二嗰集,今晚將播出「終極一戰」。MIRROR全員出動大戰ERROR,而早前被負面新聞影響嘅保錡亦有參與昨晚播出嗰集,同場仲有余逸思(Yoshi)、王頌茵(Kathy)和七仙羽師傅加入ERROR組幫忙。

第一輪「瘋味雪條」,ERROR成員扮晒借七師傅「法力」用天眼睇穿節目組用咩材料整雪條,分別估中有豆腐火腩、西多士、蝦餃、牛肉球、燒賣,如有神助,ERROR全程扮晒認真玩,玩到似模似樣,MIRROR成員姜濤更一度因七師傅法力「超準」而嚇到O晒嘴,原來事前193在茶水間見到主持Dixon份稿,Dixon用螢光筆highlight咗啲食物名,佢就用手機影低咗,因此,ERROR在第一局大獲全勝,獲得一張1000元支票。

到第二輪遊戲「跣上任務」,阿Dee知道要對MIRROR成員中最打得嘅Alton,阿Dee即跟ERROR經理人濟哥在錄影前整定一支白旗,隨時用嚟搖旗示意投降,當193質問二人點解覺得自己一定會輸,阿Dee笑稱同Alton玩好攰:「嗰種攰係你唔想再經歷多一次。」肥仔亦講明唔想同Alton比賽,Alton在賽前做咗一個拳術姿勢,阿Dee馬上搖白旗,做口形講「唔玩」,最終阿Dee都有努力去試吓吹蠟燭。

下一隊就係ERROR成員肥仔同MIRROR成員AK對戰,旁觀嘅姜濤忽然從場外撲向肥仔,以為可以阻止肥仔完成任務,不過肥仔掹力扯姜濤入場,姜濤不小心跣腳,被肥仔壓住,最終肥仔贏咗,事後小儀問到姜濤點解撲向肥仔,姜濤答:「錢!」Dixon更大笑:「你仲嫌賺唔夠呀?」姜濤即流露出招牌天然呆。到193對Jeremy,由於193顧住出茅招,最終Jeremy吹熄晒啲蠟燭。

輪到保錡出場,小儀問七師傅最支持邊一個,七師傅直言支持保錡,當大家以為七師傅講出窩心撐保錡嘅原因時,七師傅望向保錡說:「因為保錡唔輸得,佢輸咗…就攞唔到嗰1000蚊。」經過MIRROR同ERROR一番混戰,最終3比2,由MIRROR勝出,MIRROR接支票時,Alton發現支票下面有一行字寫住「扣除所有節目成本及行政費用,收益將撥捐《考有Feel》幕後團隊買飯盒及宵夜用途」,此事連主持人Edan都愕然表示不知情,更反問:「講真㗎!」Stanley就笑指節目組「自肥」,場面相當搞笑。

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner