姜濤深宵開live揭壓力爆煲 綵排期間一度暈倒

更新時間 (HKT): 2021.05.01 11:19

姜濤昨日22歲生日,實力雄厚的「姜B後援會」豪花近百萬元包起多個巨型廣告,還在「姜濤灣」(銅鑼灣)區內某商場租下一日店舖,悉心佈置成姜B生日打卡點,吸引不少「姜糖」排隊朝聖打卡。承受萬人寵愛的姜濤,現時仍忙於為演唱會綵排,為答謝一班「姜糖」的支持,今日凌晨1時,在排完舞返到屋企後,口罩都未除便開live和fans傾偈。可是,近日身心俱疲的姜濤,在開live期間心情顯得十分低落,更自揭在前日綵排時,因體力透支,一度暈倒不省人事,令愛錫他的「姜糖」心痛又擔憂。

姜濤凌晨開live時,高峯期有過萬人睇直播。在約半小時的live中,姜濤再三感謝「姜糖」為他悉心安排的生日驚喜外,不過他亦心痛fans嘥太多錢買禮物。「實在太多(禮物),其實寫卡已經好好,對一個由細到大冇乜收過禮物嘅我嚟講,收卡已經好好,每一個人祝福都收到,可能之前嗰22年冇乜收過,上天一次過彌補返畀我。」

自揭情緒變差發脾氣

在直播中,幾乎攰到瞌着的姜濤,亦有剖白自己近排的心情。「《叱咤》完咗到而家都有差唔多半年,呢段時間發生好多嘢,確實未消化得晒,好多嘢嚟得好快,攞到獎當然係好事,因為大家鍾意我同我啲音樂,係好開心,但同時壓力亦大咗好多,尤其呢排情緒好差,直到兩日前都成日發脾氣,希望之前因我發脾氣而影響到嘅人,講聲唔好意思。」

重提梅窩fans事件感難過

姜濤指一直覺得自己是個理性的人,但近半年經歷太多人和事後,現時亦會明白隊友AK(江熚生)為何會突然唔開心,他亦重提梅窩fans事件。「我知好多fans因為呢件事唔開心,我都好難過,聽到好多fans好傷心,跟住話以後唔支持我,我都有安慰自己話冇事嘅,只要做好啲作品,fans會體諒會睇到喇,但的確每一個支持我嘅人,每一個鍾意我嘅人,我都覺得好難得,好難得有一個人好鍾意,我何德何能令咁多人鍾意,所以好難過,唔知點去講。」另外,姜濤亦有提到緋聞女友Candy。「佢之前同我哋有好多新聞,呢個真係一個誤會,新聞出街後,睇到留言係咁鬧佢,想同佢講唔好意思。」

全日綵排「冇嘢落肚」

到直播接近尾聲,姜濤忽然爆出在前日綵排時,自己在排舞室,在體力透支下暈倒,不少看直播的fans大驚,紛紛留言追問他暈了多久,是否空肚綵排。姜濤說:「排排下舞,突然之間暈低咗,我事後先知道,可能真係太眼瞓、太攰,有啲暈,加上全日冇乜食嘢,就突然之間暈咗,好白癡呀……呢件事,咁我有食返嘢嘅,所以大家唔使擔心。」而他亦有透露在演唱會後會放一個長假處理自己私事。「因為而家情緒唔係好啱做嘢,覺得姜濤好多人討論,有啲唔適應,所以想畀自己唞一段時間,希望趁呢段時間醫返好隻腳。」當姜濤之後又說可能趁這段時間學跳舞和唱歌時,fans即勸他要多休息,身體最重要。臨結束前,姜濤又衷心向大家說:「多謝大家咁睇得起姜濤呢個人!」

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner