破產韓君婷自爆遭蔡國威逼遷 20年友情斷交

更新時間 (HKT): 2021.05.01 23:00

亞姐出身、現年45歲的韓君婷,早年因為要照顧患病母親,並支付龐大的醫藥費,以致欠下40萬巨債。韓母於2018年病逝後,韓君婷情緒大受打擊,身邊友人都擔心她的抑鬱症會復發,「六合彩之子」蔡國威獲悉她情況時,提出其新蒲崗公屋有多餘地方讓韓君婷搬往暫住,韓、蔡兩人開始「同居」生活。之後,韓君婷一直在美容公司打工,因受疫情影響而執笠,韓君婷無力定期還款,走投無路之下,遂在今年初向法庭申請破產。今日《壹週刊》報道指韓君婷日打兩份工,近日更搬離蔡國威住所,蔡國威亦回覆表示深信對方可以有能力養到自己才搬走,所以他也尊重韓君婷的決定。

正當外界以為韓君婷走到谷底有好轉時,其友人今日向《蘋果》爆料:「蔡國威知道君婷破產,向佢逼遷,君婷搬得好急,前後唔夠一星期就搬走咗。」

澄清非白食白住

對於被蔡國威逼遷一事,《蘋果》今日聯絡韓君婷求證,她直認有此事:「我爆出破產新聞,佢直接問我:『你究竟幾時搬走?』我好記得呢7粒字,都講到咁,我都唔住得落去喇。」

韓君婷趁機澄清自己在蔡家並非白食白住,她說:「我想澄清一點,外間成日寫我免費住佢度,其實我入住期間,每個月都有畀4位數字家用,同時我都有補給日用品,疫情最嚴重時,抗疫物品炒價都唔平㗎!我一齊住亦有分擔做清潔同家務。」

韓君婷強調自己絕對不是貪小便宜的人,她承認當日喪母後情緒不穩,蔡國威提出叫她「同居」方便照應,她也經過考慮才答應:「我都考慮咗幾日先打返去再問佢,我搬過去前都講好會分擔屋企開支同家務。佢之前冇得主持《六合彩》嗰排,我都有將家用加碼,TVB又唔係人工高,唔想佢捱麵包。」

20年友情破裂

找到廉價劏房後遷出「蔡宅」的韓君婷,被問到為何申請破產,卻仍花錢搬出去自住,她解釋:「我要對破產官交代開支,我計返畀佢家用條數,原來都夠自己搬去住劏房,咁樣我仲有租單證明交畀破產官。」雖然沒有正職,但她獲網台邀開咪,同時在網上開平台做直銷,暫時打兩份工賺生活費。其餘時間都努力搵兼職,希望盡快還清債項。

韓君婷坦言不想再被抹黑,故決心爆出真相:「我唔可以再講大話去包容佢,保護佢自尊去傷害我,破產件事都冇令我咁唔開心,打擊唔到我,最多係面子同還錢,呢啲係過眼雲煙,我都冇咁傷心。最估唔到我破產後會冇咗個朋友,認清佢真面目。而家自己住,我唔使瞓客廳瞓梳化,有自己空間,唔使睇人面色,仲搵返自己。」

對於與蔡國威「分居」後再爆「割席」,逾20年友情破裂,韓君婷說:「我相信乜都要靠自己,我會積極向前看。」問到韓君婷破產後的新生活,她謂不用開工就做宅女,因為她限定自己每天使費不能多於100元,最慳錢肯定是自己煮食,還可食得清淡,多餘時間便打坐及上網解悶,盡量享受免費的娛樂。她日前就在IG貼出打坐相,並說:「臨瞓前打坐,可以將壓力舒緩,又可以安靜地諗吓明天怎樣開始。」而韓君婷更被發現已unfollow了蔡國威的IG,還刪走部份跟蔡國威合照,似乎決心劃清界線;而蔡國威亦沒有再follow韓君婷。

偕外籍男友人散心

面對困境,韓君婷未有變得負面,反而十分樂觀,她有信心4年破產期內可以清還債務,近日還在IG貼與外籍男友人去沙灘,男方更從後攬着她、手更放在韓君婷的大腿上,展示二人親密關係,韓君婷貼相後留言:「陽光普照,影相留下美好光陰。」是否乘機公開新戀情?她說:「個男仔係朋友個男朋友,嗰日我哋成班人去沙灘玩,佢話同我影相,仲教我呢個姐姐影相擺甫士,畀返我自信心,個男仔話手放嗰度幫我遮咗唔靚嘅地方。」

韓君婷指過去3星期發生的事太多,由公開破產到搬屋忙到透不過氣:「嗰日咪去輕鬆吓,平時大家見我po社交網嘅相係開開心心,因為我想發放正能量,呢次沙灘遊,朋友帶食物,我全日使費搭咗兩程5.5元嘅小巴,來回11蚊,relax咗一個晏晝。破產我都冇話要喊,有咩大不了,馬死落地行。」韓君婷近日安頓好新居便收拾心情,她透露正傾談接拍新劇,為復出做好準備。

蔡國威講法有出入

就逼遷一事,蔡國威今日回覆傳媒時說出另一版本:「作為朋友,我唔相信佢講啲唔係事實嘅嘢。我一直都係本着幫朋友嘅心態,幫到就幫,由第一日佢搬來同我住,我已經同佢講,我供樓,水電煤各方面嘅開支都唔需要佢分擔一半,而相反我喺呢段期間,家用、收入冇增加過,支出反而多咗,但係我覺得我能力上係負擔得到,亦都可以繼續幫到朋友。」

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner