劉威煌開騷唱情歌冧富貴老婆 億萬駙馬被嘲軟飯都唔識食

更新時間 (HKT): 2021.05.01 12:39

被指是億萬駙馬的劉威煌,昨晚在麥花臣舉行音樂會,太太林佳琪(Sandy)一直在台下支持。劉威煌開場時由後台走出觀眾席唱歌,現場粉絲非常激動,很多人衝離座位跟他合照,被圍得團團轉的劉威煌還失措大叫「Oh My God」,氣氛熱鬧。全晚歌迷幾乎陷入瘋狂狀態,不斷走近台邊尖叫,劉威煌亦叮囑大家小心碰到台邊射燈免觸電,要保持社交距離,而自己亦沒有直接跟歌迷握手,只用手臂觸碰。

一輪熱身後,劉威煌表示觀眾等了半年,終於等到他開騷,更是疫情下最快開到7成半入座率的歌手。唱出《灰狗》前,他坦言此歌曾令他萌生放棄唱歌的念頭:「4年前出埋呢首歌,冇乜人理我,曾經想過唔唱,但有你哋我點會放棄。」原本他打算帶同養了多年的愛犬Jumbo到場欣賞,更推出一系列Jumbo標誌的產品在場售賣,可惜愛犬在他開騷前不久離世,之後更獻唱《一生所愛》來懷念愛犬,隨後唱出《夢中人》時,他表示唱給一生最愛的Jumbo。

安哥時劉威煌有感而發,表示網上有人形容他為億萬駙馬:「有人甚至話我軟飯都唔識食,我就係咁硬頸,我亦唔係乜嘢億萬駙馬,我想用我雙手建立想得到嘅,最重要老婆支持我,做番個男人,特別唱首歌畀佢,佢唔知今晚我會唱。」隨即唱《你是如此難以忘記》冧愛妻。完騷前他呼喚一眾支持他的歌手上台合唱《巨輪》,包括林師傑、黎瑞恩、區永權、羅凱鈴、關寶慧、何婉盈、海俊傑等人,最後在嘉賓和歌迷慫恿下加唱《友共情》後才完騷。

劉威煌完騷後表示沒想到歌迷如此熱情,不過暫沒有計劃開part 2,並自嘲人氣不足,未能開2場騷,今次是否做到收支平衡?他說:「未知,仲計緊數,可能平到。」至於重提被指是億萬駙馬,這次可會令他吐一口悶氣?他說:「唔知點解啲人咁講,直情係人身攻擊,話我係軟飯王,又有人話我軟飯都唔識食,白癡!係唔係都俾人話,我問心無愧。」他不希望有誤會,寧願有日跟取笑自己的人互相認識,交個朋友。

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner