欠債40萬投靠好友同居公屋終反目 
破產韓君婷遭蔡國威逼遷

更新時間 (HKT): 2021.05.02 02:00

韓君婷近年因照顧患病母親,欠下40萬醫藥費,韓母2018年病逝後,她大受打擊,幸得相識多年的亞視好友蔡國威伸出援手,讓韓君婷與他同住公屋寓所。不過韓君婷今年初,因財困向法庭申請破產,事件公開後,韓君婷昨日指慘遭蔡國威逼遷,她說:「我爆出破產,佢即問我幾時搬。」並指終於揭開蔡國威真面目,二人再見不是朋友。

現年45歲的韓君婷上月被指欠下40萬要申請破產,她坦言為醫治抑鬱症及照顧病母花光積蓄,已在1月申請破產,當時她更感激與她分租的蔡國威。其實自韓母2018年病逝後,好友擔心韓君婷會抑鬱症復發,而蔡國威得悉她情況後,提出他所居住的新蒲崗東頭邨公屋寓所有地方,韓君婷可搬入與他同居。

近年韓君婷轉行做美容,但去年受疫情影響公司執笠,韓君婷無力定期還款,今年1月向法庭申請破產。不過韓君婷上周接受訪問,忽然表示已搬離蔡國威家,她說:「我要重整一下人生。」蔡國威則向傳媒表示,深信對方可以有能力養到自己才搬走,所以尊重韓君婷的決定。然而韓君婷友人昨日向《蘋果》爆料:「蔡國威知道君婷破產,向佢逼遷,君婷搬得好急,前後唔夠一星期就搬走咗。」韓君婷近日更取消追蹤蔡國威的Ig,又將兩人合照刪除。

月付四位數家用

據知韓君婷頻撲找到廉價劏房便搬走,《蘋果》昨日聯絡韓君婷,她直認被蔡國威逼遷:「我爆出破產新聞後,佢直接問我『你究竟幾時搬走』,我好記得呢七粒字,都講到咁,我都唔住得落去喇。我想澄清一點,外間成日寫我免費住佢度,其實我入住期間,每個月都有畀四位數字家用,同時我都補給家用品,疫情最嚴重時,抗疫物品都炒價唔平㗎,我一齊住亦有分擔做清潔同家務。」

韓君婷強調自己絕不是貪小便宜的人,當日蔡國威提出叫她同居,她亦不是立刻答應:「我都考慮咗幾日,先打返去問佢,我搬過去前都講好會分擔屋企開支同家務。佢之前冇得主持六合彩嗰排,我都有將家用加碼,TVB又唔係人工高,唔想佢捱麵包。」

至於韓君婷破產卻有閒錢搬出去自住,她解釋:「我每月要對破產官交代開支,我計返畀佢家用條數,原來都夠自己搬去住劏房,咁我仲有租單證明交畀破產官。」韓君婷坦言不想再被抹黑:「我唔可以再講大話去包容佢,保護佢自尊去傷害我,破產件事我都冇咁傷心,最估唔到我破產後會冇咗個朋友,認識咗佢真面目。𠵱家自己住,我唔使瞓客廳瞓梳化,有自己空間,唔使睇人面色,搵返自己。」

沒有正職的韓君婷早前獲網台邀開咪,同時又做KOL開平台「帶貨」,暫時打兩份工賺生活費。韓君婷近日在Ig貼與老外去沙灘,男方更從後攬着她的大髀影相,展示二人親密關係,是否乘機公開新戀情?她說:「個男仔係朋友個男朋友,佢教我擺甫士,個男仔話手放嗰度幫我遮咗唔靚地方。」

蔡:唔需要佢分擔

韓君婷被逼遷,蔡國威昨日回覆傳媒時說出另一版本:「作為朋友,我唔相信佢講啲唔係事實嘅嘢。我一直都係本着幫朋友嘅心態,幫到就幫,由第一日佢搬來同我住,我已經同佢講,我供樓,水電媒各方面嘅開支都唔需要佢分擔一半,而相反我喺呢段期間,家用、收入冇增加過,支出反而多咗,但係我覺得我能力上係負擔得到,亦都可以繼續幫到朋友。」

娛聞樂陪你走遍全球追星,即Like「娛果」FB 專頁!
BannerBanner