蔡國威FB誓言無逼走破產韓君婷 直斥對方不長進:做朋友都仁至義盡

更新時間 (HKT): 2021.05.02 11:46

早前宣佈破產的韓君婷,昨日突爆遭相識20載的好友蔡國威逼遷,兩人反目,女方更怒刪部份在IG中的二人合照,又取消對男方的關注,20年友情凍過水。至昨晚深夜,被指逼走財困韓君婷的蔡國威,分別在社交平台facebook及Instagram撰文澄清,他就女方指控「你究竟幾時搬走?」一言,堅決否認自己有講過:「我可以對燈火發誓,完全冇講過!」

現年47歲、有「六合彩之子」外號的蔡國威,昨被「同居」兩年的韓君婷爆料指:「我爆出破產新聞,佢直接問我:『你究竟幾時搬走?』我好記得呢7粒字,都講到咁,我都唔住得落去喇。」但蔡國威在社交平台發誓自己冇講過,他指:「當日係韓小姐自己親口同我講話搵到理想職業,可以養到自己。」換句話說,屋主只是在「同居者」搬走前一晚,收到對方的口頭通知,顯得男方也是處於被動狀態。

家用定雜費?

韓君婷昨日指,自己在蔡家非白食白住,每月都有畀4位數家用,亦稱自己有份買補給日用品,抗疫期間也有捱炒價買抗疫物資,而她有做清潔同家務。蔡國威指由day 1開始,已經同女方講過不用她負擔家中開支:「每個月佢會放低1,000蚊畀我,有時多500,唔係我要求嘅,係佢自己當係補貼下一啲雜費,咁你擺低我咪收,就算《六合彩》停期間,我自己屋企所有開支都應付自如,我根本無需要捱麵包。」蔡國威更指為了家中多了一個同居者,花錢租迷你倉放東西,以騰出更多空間給韓君婷用。

蔡指韓離地

另一方面,就韓君婷稱留居蔡家期間,自己要做「廳長」瞓梳化,蔡國威反駁指自己一開始讓房出來給女方,是女方拒絕並指自己可以瞓廳;而且他認為自己是「犧牲私人空間,無條件畀你(韓君婷)住兩年。」對於自己被指抹黑女方,蔡國威似乎對這個說法的反應有點激動,他留言:「你自己唔長進、唔腳踏實地,自己堅持辭職賴疫情,我做朋友都仁至義盡。」而他另在IG出post嘆:「最後我要講一句,雖然我唔係咩富有人家,能力所及、可以幫,我都盡量幫,唔係需要你歌功頌德,但點解要以怨報德?」

蔡國威否認自己取消關注韓君婷的IG,他形容行為「小學雞」,而事實上,《蘋果》昨晚9時左右實測過,蔡國威與韓君婷的IG的關注名單上,的確沒有對方的存在。蔡國威出post後,有網民留言撐他,又指最緊要無愧於心,有人明言相信及支持他;另有不少人留言安慰,叫蔡國威「唔好為某啲唔值得嘅人搞到自己唔開心!Say bye and move on.」、「一笑置之」。

韓君婷:佢繼續大話落去

對於蔡國威FB言論,韓君婷今日電話回覆《蘋果》:「其實我噚日講晒出嚟,我都已經舒服咗好多㗎喇,咁呢個人繼續想去做新聞嘅話,佢繼續大話落去,我都唔可以再理會佢,我只會做好自己,保護自己,正面咁去面對未來,我唔會再去畀呢啲負能量嘅人去傷害我囉。」隨後韓君婷在IG分享了一篇心靈啟發文章,並帖文寫上「我不想再包容你去講大話去傷害我。我不會好似別人製造新聞,傷害人讓自己出位,人生就是過眼雲煙,我只會做好自己正面去面對未來。」

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner