獨家丨外傭擅闖遊艇開船P趙式芝嗌報警 趙世曾放生唔使炒:警告咗佢

更新時間 (HKT): 2021.05.03 19:43

現年84歲、上市公司卓能集團(0131)主席趙世曾位於薄扶林趙苑豪華大宅「樂居」昨日凌晨遭賊人潛入爆竊後,今日讀者Y小姐向《蘋果》報料,指一班疑似外籍僱傭近3星期都在趙生的遊艇開派對,指她們逢周日假期,一早相約在大潭碼頭集合出海,玩足全日,還肆無忌憚將相片上載IG。

Y小姐接受電話訪問說:「我知道佢哋已經連續3個星期都一齊上船,估計都有出海嘅,而相中嗰班係咪趙生嘅傭工就唔知。聽人講其中一個男嘅係趙生嘅傭工,佢嘅家姐同細佬都喺趙生度打工,個男嘅已經同出面一個工人姐姐結婚有咗BB,聽講趙生仲叫埋BB一齊喺大宅住。」Y小姐並提供多張疑似是外籍女傭在趙生的遊艇上開派對的IG相片,約有10多人穿上比堅尼玩得盡興,有擺性感姿勢單人相,又有大合照,在船上切蛋糕、吃自助餐,相信是在慶祝生日;另外有張相片是一男一女合照,身後看到一架相信是趙生所擁有、掛着CECIL車牌的勞斯萊斯。

趙世曾大女趙式芝則表示全不知情,覺得事態嚴重:「多謝報料呀,咁嚴重,要調查吓先。」若確實事件會否報警處理?她說:「梗係會啦!咁多閒雜人等上私人地方,要刑事處理。」半小時再追問詳情,趙式芝表示:「而家同警察通話中,稍後再回覆。」晚上《蘋果》聯絡上趙世曾,他對於趙家遊艇變成外傭派對用地,他大方說:「冇乜特別嘢,已經警告咗佢,唔使報警,佢哋以為我唔知,而家我知道,叫咗佢哋以後唔好搞。」問到會否炒了那些工人?他說:「都未到咁嚴重,暫時警告咗,唔聽話先再算。」

而趙世曾兒子趙式浩看完相片後,表示認得遊艇是屬於爸爸,但不認得是否涉家中傭工,問到會否報警?他說:「多謝爆料人,相信老竇會處理。其實我都好耐冇去,相片唔似近年,因為架船好多嘢等緊維修。」對於趙世曾豪宅遭爆竊,損失逾百萬財物,趙式浩表示有回家探爸爸:「噚晚有過老竇度,好多警察,佢Ok嘅,係年紀有番咁上下,攰啲啫。」

昨日凌晨趙家的爆竊案,趙世曾於凌晨回家後發現睡房的夾萬被打開,裏面空無一物,懷疑被人爆竊便報警。據知,睡房內並無安裝閉路電視,經初步點算後,夾萬內一隻價值約100萬元的伯爵腕錶、一隻約值5萬元的名錶、合共40萬元的現金及小量外幣,連同趙世曾的身份證亦被偷走,警方將案件列作爆竊,不排除竊匪從山坡爬樹入屋犯案,暫未有人被捕。趙生回應事件:「係小事。」

-----------------------------

蘋果App大升級 更簡潔更就手!了解更多立即下載體驗

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

娛聞樂陪你走遍全球追星,即Like「娛果」FB 專頁!
BannerBanner